Aruba ta conta cu un comunidad hopi diverso di stranheronan di diferente nacionalidad, cu ta bibando na nos pais. Stranheronan decente y honesto cu ta contribuyendo na nos pais y comunidad cu nan trabao duro y nan amabilidad. Ta pesey, mi a keda asmobra ora ma tuma nota cu Miguel Mansur ta campañando duro pa pisca voto di stranheronan. Dicon ma keda asombra? Pasobra segun Miguel Mansur stranheronan no tin e mesun derechonan cu ne, pio si nan ta cristian, catolico of un persona di fe. Ta prohibi pa lubida con Mansur a perde cabes dia 12 di Februari 2023 y a ataca tur stranhero di un forma hopi baho a traves di un comunicado riba su plataforma social. Miguel a lansa un atake emocional y dictatorial den cual el a expresa su mes totalmente contra derechonan humano di tur stranhero.
Februari 12 2023 un dia scur: Miguel Mansur trapando riba derechonan di stranhero.
Miguel Mansur a haya ta bon di skirbi un articulo brindando pueblo un splicacion falso con nos democracia ta hinca den otro, pa di e forma ey, lanta rabia den pueblo contra stranheronan. E acto aki, uno sumamente lamentabel, ta e forma con Mansur ta hiba su politica constantemente. Laga nos analisa algun frase for di su declaracion haci riba 12 di Februari 2023; “Lidernan di secta stranhero cu kier bin fomenta odio y division den nos pueblo y destrui e fundeshi constitucional di nos pais mester wordo declara persona non-grata, nan permiso revoca y deporta bek pa nan pais sin mas.” Di e forma aki Mansur no a ataca solamente e lidernan di gruponan stranhero, sino tambe e comunidad stranhero den su totalidad, specialmente esnan cu tin un fe cristian, catolico of otro denominacion. Segun Mansur, si un stranhero ta expresa su mes contra su idealnan, inmediatamente e ta un peliger, un menasa y mester wordo elimina for di nos pais. Ademas, Mansur arogantemente a declara e stranheronan ey personanan non-grata, y cu mester revoca nan permiso y deportanan bek pa nan pais! Mansur por tabata mas dictatorial y anti-democratico cu esaki? Acaso stranheronan residencia na Aruba no tin e mesun derecho constitucional cu localnan tin? Acaso organisa un protesta pacifico no ta parti di nos democracia? Acaso stranheronan no tin e derecho pa expresa nan mes libremente? Segun Mansur, no!
Desesperacion Politico: Haci promesa na esnan cu bo kier deporta!
No ta un secreto cu e agenda politico cu Mansur ta hibando no ta cay den bon tera cerca mas di 90% di nos poblacion. Despues cu Mansur a declara stranheronan personanan non-grata, cu mester revoca nan permiso y deportanan inmediatamente, awor e kier nan sosten! Mundo riba su cabes! E politico “deportador” awor kier bira e politico “salbador?” Deporta stranhero ta cuadra cu Mansur su slogan politico “Ban Biba Miho?” Kita derecho constitucional di stranhero ta ekivalente na “Ban Biba Miho?” Mansur, ta ken ta e PA-TE-TI-CO awo?
