Parlamentario Otami Thomasia a duna un update importante riba un tema cu toca hopi famianan na Aruba: e ayudo social (bijstand) pa mucha cu limitacion entre e edad di 0 te 16 aña. Segun Thomasia, e politica aki tabata un iniciativa cu durante e gobierno anterior bou di ex-parlamentarionan Mike Eman y Mervin Wyatt Ras ya tabata den desaroyo. “Nan a traha e base y a pone e tema dilanti,” e a bisa, “pero e momento ey no a logra implementacion final.”
Actualmente, e tema ta cay bou di e Landspakket—e acuerdo structural cu ta orienta Aruba riba reforma y sostenibilidad financiero. “Esaki ta nifica cu e procedemento mester sigui su trayecto tecnico y legislativo, pero mi por sigura bo cu e ayudo aki ta den caminda,” Thomasia a enfatisa. “Nos ta sigui su desaroyo pa garantisa cu esaki lo bira un parti permanente di nos sistema di sosten y asisti e famianan cu ta enfrenta e reto aki dia tras dia.”
Pa e parlamentario, esaki no ta solamente un asunto di ayudo financiero, sino un cu ta toca e tema fundamental di inclusion den nos comunidad. “Ora nos ta papia di inclusion, nos ta papia di tur grupo: nos hende grandi, nos mayornan, nos mucha y definitivamente nos muchanan cu limitacion. Tur hende tin derechonan igual pa forma parti activo di nos sociedad,” el a declara.
E punto di partida ta duna accesibilidad: cu e mucha por bay scol, por haci deporte, por wak su dokternan sin obstaculo financiero.
“Hopi mayornan no sa cu e gasto pa cuida un yiu cu limitacion entre 0 y 16 aña ta generalmente no cubri. Nan ta mester inverti hopi den adaptacion di su cas, compra ekiponan, of drecha un espacio seguro pa e mucha. Esaki ta un carga economico cu hopi hende no por carga su so,” el a bisa. Den hopi caso, un di e mayornan mester para di traha, cu ta pone presion riba e stabilidad di e henter hogar.
Otami Thomasia ta pidi pasenshi di pueblo. “Nos sa cu tin mayornan ta warda riba e ayudo aki. Nos no a lubida boso. E ta den nos curason y e lo tuma tempo, pero lo yega. Hunto cu fraccion di AVP, nos lo sigui lucha pa esaki pa wak cu e ta keda realisa den interes di nos pueblo.” Segun Thomasia, esaki ta un paso esencial pa yuda forma un Aruba mas husto y solidario, unda tur hende, sin exclusion, por tuma su luga y biba cu dignidad.
