Parlamentario Raymond Kamperveen su mocion cu ta urgi Gobierno pa kita cu adultonan mayor tin cu paga pa remedi, ta wordo aproba.
Diahuebs 27 di juni 2024, den sala di Parlamento durante tratamento di e presupuesto supletorio, Parlamentario y miembro di fraccion RAIZ, Raymond Kamperveen, a entrega un mocion cu lo trece alivio pa nos adultonan mayor, na unda nan lo bay bek na por ricibi remedi sin mester paga pa esaki.
AZV a introduci loke nan a yama e ‘positieve lijst’, 1 di april 2021, como un manera pa baha gasto, algo cu tawata parti di e Landspakket. Despues di 1 luna, esta 1 di mei 2021, ela wordo elimina. Ta asina cu desde 30 di september 2022 AZV a bolbe stop di cubri tur remedi. Esaki a afecta esnan cu mas mester di remedi, esta nos adultonan mayor.
E ‘positieve lijst’ ta un lista unda ta poni cual remedi ta wordo cubri y cual no. AZV a opta pa haci esaki pa baha gasto y mehora su position financiero. Awo cu e organo ehecutivo di AZV a indica cu nan fondonan ta stabiel y cu tin un surplus, Parlamentario Raymond Kamperveen a haye na su luga pa Gobierno bolbe elimina e ‘positieve lijst’ y a presenta un mocion na Parlamento, co-firma cu Parlamentario Tromp-Lee.
E mocion a wordo aproba cu 20 voto pro. Parlamentario Miguel Mansur a opta pa bandona sala ora di vota pa e mocion cu lo elimina e costo pa remedi pa adultonan mayor.
