Parlamentario Ricky Hoek (MEP): Bay vota diabierna awor ta nos derecho y nos responsabilidad pa un futuro miho

Den cuadro di e eleccion Parlamentario di Aruba cu ta tuma lugar dia 6 di December proximo, Parlamentario Ricky Hoek, di Fraccion di MEP, ta dirigi un mensahe importante na e pueblo tocante e balor grandisimo y e importancia di eherce bo derecho di voto.

“Nos derecho di voto no solamente ta un derecho fundamental, pero tambe ta un acto di responsabilidad cu tin impacto real riba nos futuro y nos isla,” Parlamentario Hoek ta enfatisa. “Cada voto ta conta y cada persona tin e poder pa drecha e rumbo di nos pais.”

E eleccion parlamentario ta un momento crucial pa nos democracia. E eleccion di gobernacion no ta solamente pa awe of mañan, pero ta un eleccion pa nos y pa e generacionnan cu ta bini tras di nos. Parlamentario Hoek ta haci un yamada na pone atencion riba e importancia di participacion civico pa sigura cu e bos di cada ciudadano ta wordo scucha.

Pero, ademas di yega na e urna di votacion, ta crucial pa e votado ta consciente di e importancia di su decision. “Nos voto mester ta basa riba conocemento di e programanan y e ideanan cu e candidatonan y partidonan ta representa. Ora nos vota di forma consciente, nos ta contribui na un futuro basa riba stabilidad, progreso y un gobernacion cu ta den sintonia cu e necesidadnan di nos pueblo,” Parlamentario Hoek a destaca.

“Bo voto ta bo bos. Ora bo wak e cora riba bo papel di voto, bo ta votando pa un miho futuro pa nos dushi isla”, Hoek a bisa. “E posibilidadnan di empleo, educacion, cuido di salud y proteccion di nos medio ambiente ta depende di e decisionnan cu bo por ta influenciando a traves di bo voto.”

Na un momento den historia unda hopi pais ta luchando pa mantene e estabilidad democratico, Parlamentario Hoek ta resalta cu Aruba tin un sistema democratico fuerte. Pero esey no por ta un motibo pa nos ta complaciente. “Eleccion ta ora nos ta cumpli cu nos deber civico y ta masha importante pa e participacion ta halto pa e dia crucial aki,” e ta agrega.

Di parti di Fraccion di MEP, e mensahe ta cla: sali tempran dia 6 di December, laga bo bos wordo scucha y confia cu MEP lo sigui lucha pa un futuro miho pa Aruba y pa su pueblo.