Parlamentario Ricky Hoek di Fraccion di MEP, a duna un declaracion relaciona cu e reunion informativo cu a tuma lugar diamars den sala di Parlamento.
Manera ta conoci, Fraccion di MAS a yama e reunion aki hunto cu Fraccion di Accion21 pa un reunion publico (OV) caminda cu nan kier a pone como topico e metemento politico directo di Prome Minister, Evelyn Wever-Croes den Ministerio Publico.
Ora cu e peticion aki a sali, Presidente di Parlamento, Sr. Kamperveen a cambia e caracter di e reunion aki pa un reunion informativo (OB) caminda cu a tende cu a bisa cu esaki lo por trece un poco di intrankilidad y instabilidad den comunidad como tambe pa Parlamento di Aruba. Riba su mesun discrecion, Presidente di Parlamento a dicidi di cambia e reunion di OV pa un OB, esta un reunion informativo, Hoek a indica.
Ora cu e reunion a cuminsa diamars mainta 9’or, oposicion a bay contra e decision di Sr. Kampeerveen pasobra nan ta bisa cu nan a pidi un reunion publico y nan no ta di acuerdo cu un reunion informativo.
Parlamentario Hoek ta kere cu a keda demostra den poco menos di dos luna y falta un luna pa eleccion, cu oposicion ta falta di respet pa e mesun presidente di parlamento cu nan a scoge dia 9 di september. “E mesun fraccion di Accion21, Gerlien Croes, lider di Futuro, Marisol Tromp y Aquannette Gunn di fraccion di MAS, y fraccion di AVP. Ta netamente e mesun fraccion di RAIZ cu a vota pa Sr. Kamperveen, ta netamente e fraccionnan di oposicion cu a lanta contra e mesun presidente cu nan a pone dia 9 di september”.
Esaki a mustra un falta di respet grandi pa e instituto di Parlamento, pa Presidente di Parlamento, pa politica y pa pueblo di Aruba, demostrando cu kier a trece un inseguridad y instabilidad grandi riba Pais Aruba.
Ya caba dia 9 di september nan a baha Sr. Edgard Vrolijk como Presidente di Parlamento, despues nan a kita e presidencia di comision di finanzas for di Parlamentario Setty Christiaans-Yarzagaray. Dos siman pasa nan a dicidi di baha Sr. Endy Croes como Minister di Enseñanza y Deporte.
El a splica cu for di momento cu dia 9 di september nan a haya 11 voto, nan a cera cabes y a bin cu un complot, un bloke di oposicion entre Futuro, MAS, Accion21, AVP y RAIZ, cu awe ta wak e instabilidad politico den comunidad.
