24ora un biaha mas mal informando pueblo
Desde 29 september 2021 a sali den tur medio di comunicacion cu 20 espacio di parkeo (parkeervak) lo keda asigna na e parlamentarionan. E espacionan di parkeo aki lo ta den e parkeerplaats dilanti di Renaissance Marketplace. Sinembargo, e parkeonan asigna na e parlamentarionan a keda ser usa pa tur automobilista cu yega na e sitio aki. Riba 22 di october 2021 a anuncia den tur medio di comunicacion, incluso 24ora, cu e biaha aki lo pone borchi di parkeerplaats pa e parlamentarionan. Lamentablemente, ni cu e borchi nan aki, te dia di awe e parkeonan asigna pa parlamentarionan no ta wordo respeta.
Diabierna atardi dia 7 october 2022, 24ora ta bai live y ta sorpresa dos colega parlamentario saliendo for di trabou cu preguntanan encuanto parkeo. Loke mas ami ta condena ta e hecho cu e reportero di dicho medio di comunicacion ta duna informacion personal dimi y mi auto – unda e respet pa mi privacidad a keda? – y ta acusa mi cu mi a kibra regla di parkeo. Por ultimo ta duna informacion incorecto tocante di parkeo den ‘cura’ di parlamento.
Manera pueblo por a tuma nota, Director di Aruparking a bin ta anuncia cu lo reactiva Aruparking desde 5 di october ultimo, cual e mesun dia aki mi persona a ricibi un sticker for di Aruparking riba mi auto para den e parkeo asigna pa parlamentarionan.
Pa crea sensacion y conmocion den pueblo, 24ora ta core filma mi auto, e number di mi auto, menciona mi nomber y solamente lesa e orario cu ta para riba e sticker, sin menciona e fecha corecto. Di e manera aki insinuando cu mi a haya un sticker debi cu mi a para banda di Presidente di Parlamento di Aruba su espacio di parkeo. Tambe e reportero ta indica cu parlamentarionan tin un badge di cual por ser usa pa nan para paden den ‘cura’ di edificio di Parlamento di Aruba si no tin espacio dilanti. Esaki ta totalmente incorecto. Nos como parlamentarionan por parkeer solamente na e sitionan asigna cu borchi of sino despues di 4’or y mey di atardi por drenta cu badge pa parkeer paden. E motibo pakico mi tabata para na e sitio caminda 24ora a bin filma mi auto, ta pasobra ora mi a yega parlamento 2’or di merdia pa atende un reunion importante, un bes mes TUR parkeo di parlamentarionan tabata yen cu autonan cu no tin permiso pa para tras di e borchi di parlamentario.
Loke 24ora tampoco sa, ta cu mi persona tin 2 siman caba ta dialogando cu Minister Ursell Arends riba e asunto di parkeo pa parlamentarionan y cu te ainda ta den tramite di yega na un solucion concreto.
Finalisando mi ta subraya cu mi no tabata mal staciona y tampoco a kibra regla di parkeo. Mi ta urgi 24ora pa informa pueblo corectamente y pidi pueblo pa respeta e espacio di parkeo asigna na parlamentarionan.
