E ley lo beneficia mucha y hoben mas ainda

Pa hopi tempo caba ta wordo traha riba e organo independiente di ‘Ombudsman’ (Defensor di Pueblo). Esaki debi, cu ta necesario pa e bon funcionamento di nos estado di derecho, cu e ciudadanonan tin confiansa den nan gobierno. E Ombudsman ta aporta na engrandece e confiansa den e gobierno, door di ta un organo independiente y neutral na momento cu e ta trata e casonan di e ciudadanonan. Banda di e Ombudsman lo tin tambe e Kinderombudsman (cu ta e Ombudsman-substituto). Asina por mira cu riba 24 di september 2020 Parlamento di Aruba a aproba e Landsverordening Ombudsman (AB 2020 no. 145). 

Durante di aña parlamentario 2021-2022 Parlamento di Aruba a trata na hancra e Ombudsman na forma constitucional como un Colegio Superior di Estado (Hoge Colleges van Staat) den e Constitucion di Aruba. Lamentablemente, esaki no a bira realidad na momento cu parlamento no por a conta cu un mayoria di 2/3 parti di votonan pa carga e iniciativa di ley aki. E motibo pakico no a logra e mayoria di 2/3 parti ta pasobra oposicion lamentablemente a dicidi di bay haci politica durante un reunion asina importante y na final nan a vota contra esaki. 

Despues di e reunion aki a haci algun adaptacion huridico den e Ley di Ombudsman, e.o. nombramento y despedida di e Ombudsman y Kinderombudsman (e ombudsman-substituto) y investigacion pa mucha y hoben. Despues e ley a bai Parlamento di Aruba un biaha mas. E ley aki a keda trata den un reunion publico riba dialuna 23 di januari 2023 y a wordo aproba cu 11 vota na fabor (MEP-RAIZ).

Adaptacion den e ley cu beneficio pa mucha y hoben 

Un adaptacion importante den e ley di Ombudsman ta articulo 2. A agrega den e articulo aki cu lo bin cu un area adicional di interes pa e Ombudsman/Kinderombudsman. Esaki ta encera cu lo bai realisa investigacionnan cu ta destina pa promove e igualdad di oportunidad pa nos mucha- y hobennan. Por ehempel, si un mucha of hoben ta sufri di un problema mental of cu su salud y e no por atende scol debidamente, e ora e Kinderombudsman por lo investiga y conseha kico ta e mihor manera cu e mucha of hoben por sigui su scol sin cu e ta wordo perhudica.   

Realisacion di e Ley di Ombudsman y Kinderombudsman 

Na aña 2022 Parlamento di Aruba a aproba e presupuesto di e Ombudsman y Kinderombudsman. Esaki ta encera un costo di 1 miyon florin pa e di dos mitar di aña (dienstjaar) di 2023. Pa aña (dienstjaar) 2024 lo tene cuenta cu un presupuesto di 1,5 miyon florin na costo di e organo aki. Na momento cu Parlamento di Aruba a aproba e ley di Ombudsman cu e adaptacionnan presenta, esaki lo bira un realidad y lo por cuminsa cu e proceso di ehecucion di e organo importante aki.    

LEAVE A REPLY

Please enter your comment!
Please enter your name here