Durante e programa diasabra “Interes di Pueblo” na Top 95.1 FM, Parlamentario di MEP, Rocco Tjon a confirma cu e situacion di “perdicion” pa loke ta trata e candidato minister tin di haber cu un falta di liderazgo di parti di Mike Eman, kende ta e formador y Prome Minister actual. E ley di screening ta stipula bon cla cu ta e formador mester haci e voordracht na Gobernador pa un candidato por bira minister. Aparentemente, tur informacion tocante e candidato, sr. De Meza, a wordo entrega caba na Eman. Sinembargo, Eman a conseha De Meza pa entama un caso hudicial pa asina supuestamente ricibi mas documentacion pa por haci e voordracht. Esaki ta parce di ta un wega politico, segun Tjon. Departamento di Impuesto a confirma durante tratamento di e caso cu tur documento necesario a wordo entrega na Eman na dos fecha caba. Si ainda no tin un voordracht, ta pasobra Mike Eman no kier haci e voordracht pa Mike de Meza.
