Cu asombro nos a tuma nota di un comunicado di sr. Bermudez di AVP tocante FCCA. sr. Bermudez ta bisa cu 6 di maart a entrega e nota di cambio pa aloca e fondonan pa FCCA, despues cu a perde eleccion. Sr. Bermudez a expresa lo siguiente: “Si bo tabata kier FCCA asina bon, si e ta na bo pecho, si bo kier a mira cas social construi; bo por a mira pa FCCA haya placa na 2024 of na 2023, pero nunca FCCA tabata den bo interes.” Mi ta kere ta bon momento pa indica Sr. Bermudez ta na unda e tin cu lesa pa e por wak pa su mes cu e decision pa yuda FCCA a keda tuma ya for di medio 2024 caba!
Decision a wordo tuma 20 augustus 2024
Si sr. Bermudez di berdad a haci su trabou manera debe ser e lo por a lesa den e nota di cambio, riba pagina 3 bou di Algemene Toelichting na e ultimo frase di e blachi, cu e decision aki a ser tuma 20 di augustus 2024 den conseho di Minister di Gabinete Wever-Croes II. Literalmente tin skirbi: “Dit alternatief is reeds besproken en geaccordeerd in de ministerraad van 20 augustus 2024. E mas tristo den tur esaki ta cu sr. Bermudez den su afan pa defende Minister Wever no a para keto na e hecho cu Minister Wever mes a forma parti di e decision di 20 di augustus 2024 aki.
Reunion den parlamento cu FCCA 6 mei 2025
Dia 6 di mei 2025 den Parlamento nos a reuni cu FCCA. Nan a duna Parlamento un presentacion titula “Dringende noodzaak van woningbouw” (E urgencia grandi pa vivienda). Durante e reunion a splica cu tin 3500 persona riba lista di espera. Tambe a splica e proceso cu a ser encamina pa por a yega na acuerdo y palabracion cu Gobierno pa a logra haya e 19.7 miyon florin aloca. Nos ta gradici Sr. Bermudez den su intento pa haci politica nobo, lastimamente pa logra esaki bo mester percura pa lesa tur bo documentonan bon si prome pa evita malinformacion.
Pa conclui
Den e politica di sr. Bermudez di ken a traha cas y ken no a traha cas mi no lo bay. Tur hende por check pa nan mes bou cua Gobiernonan casnan social a wordo traha. Hiba politica nobo y profesional no ta wordo haci door di palabranan bunita pero mas bien door di bo hechonan y si di berdad bo ta informa pueblo na un forma honesto y transparente.
