Parlamentario Louisette ‘Setty’ Christiaans-Yarzagaray di Fraccion di MEP, a pone enfoke riba un serie di desaroyonan importante durante su periodonan den Parlamento di Aruba, enfoca na bienestar di comunidad, sostenibilidad, y progreso social.
Un di e proyectonan mas sobresaliente di Yarzagaray ta su esfuerso pa implementa castigo mas severo contra abuso di mascota. E ta trahando riba cambio di ley pa crea consciencia, hisa castigo y aumenta proteccion pa cacho, pushi y otro animal domestic y responsabilidad na e doñonan, demostrando su compromiso pa promove respet pa sernan vulnerabel.
Otro logro significativo ta e mocion, cu a wordo aproba unanimamente, pa crea un sistema pa centralisa e resultado di test medico di pashent y citanan medico. Esaki ta pone cu e pashent por tin acceso rapido na su propio informacion medico y sigui su file medico, planea un afspraak (volgsysteem), fortaleciendo un sistema di salud mas transparente y accesibel.
Por menciona tambe, su iniciativa pa introduci e ‘Bijzonder Commissie’ di Metanan di Desaroyo Sostenibel (SDG) pa yuda pone e metanan di SDG den ‘forefront’ di e politiconan di Aruba, den busca di un futuro mas sostenibel pa un y tur.
Parlamentario Christiaans-Yarzagaray tambe a reconoce e importancia di maneha reproduccion responsabel di cacho y pushi, presentando un mocion, cu a wordo aproba, pa crea deduccion di belasting pa doñonan cu sterilisa nan mascota. Esaki no solamente ta dirigi contra sobrepoblacion di animal domestico, sino tambe promove salud publico y bienestar di animal.
Un otro area di impacto ta su mocion pa recalibra e ‘bestaansminimum’ di Aruba. Cu un recalculacion y un analisis di e splicacion relaciona cu pobresa, e medida aki ta duna gobierno y organonan cu ta traha pa yuda comunidad un base mas concreto pa forma plannan y maneho di apoyo economico y social.
Ademas, Christiaans-Yarzagaray a propone y realisa e aceptacion di un ‘Geographical Information System’ (GIS) cu ta un plataforma digital cu por combina informacion di diferente departamento di gobierno riba un mapa digital di Aruba. E herment aki ta permiti gobierno pa planifica infrastructura y servicionan cu mas eficiencia y precision.
Finalmente, Christiaans-Yarzagaray a asegura fondonan pa finalisa e ‘Tourism Satellite Account’ (TSA), un sistema cu ta contribui pa un calculacion mas preciso di turismo su impacto den economia di Aruba, un proyecto realisa awor pa pais Aruba.
Esaki ta resalta su dedicacion pa desaroyo economico a base di informacion concreto, pa asina guia decisionnan strategico cu ta beneficia tur hende.Parlamentario Christiaans-Yarzagaray su esfuerso no solamente ta fortifica e sistema legislativo di Aruba, sino ta crea un futuro mas sostenibel y bunita pa comunidad henter.
