Parlamentario Drs. Shailiny Tromp-Lee ta lamenta profundamente e nivel di populismo y amnesia politico cu fraccion di AVP ta demostrando ora nan ta trata e Jaarrekening 2020. Den un intento desespera pa mancha e liderazgo di Evelyn Wever-Croes, AVP ta bati riba e falta di “base legal” di FASE na 2020, lubidando cu na e momento ey, Aruba tabata den un guera contra un virus invisible y un colapso economico total.
Tromp-Lee ta papia cla y cu echo: na 2020 Aruba tabata den un crisis sin precedente. Cu 25.000 persona sin trabou den un siman, no tabatin tempo pa sinta warda lunanan largo riba un ley prome cu yuda famianan. E prioridad di Gabinete Wever-Croes tabata pa e tata y mama di famia por a pone pan riba mesa pa nan famia,” Tromp-Lee a declara.
Hamber of burocracia?
E Parlamentario ta cuestiona seriamente si AVP lo a prefera laga pueblo sufri hamber pa djis cumpli cu un formalismo prome. Pa MEP, e ser humano semper ta bin na prome luga. Tromp-Lee a enfatisa cu e decision principal tabata pa garantisa e bienestar di e ciudadano prome y, posteriormente na aña 2022, a formalisa tur e procesonan legalmente den Parlamento. E paso aki a wordo haci netamente pa garantisa transparencia total y duna e base legal necesario na e yudansa cu a wordo brinda durante e crisis mundial.
Falta di Moral: E ‘MEGA debe’ y PPP
E Parlamentario a hiba un critica fuerte contra e moralidad di AVP pa papia di “debilita estado di derecho”, recordando nan e maneho financiero di nan mesun partido. El a señala cu e critica riba e 43 miyon di FASE ta un insulto pa e inteligencia di pueblo, specialmente ora cu AVP mes a laga e pais carga cu un MEGA debe structural y proyectonan PPP iresponsabel. Segun Tromp-Lee, e maneho ey tabata precisamente e motibo pakico e situacion financiero di Aruba tabata asina precario caba prome cu e pandemia a dal.
Conclusion
Segun e Parlamentario, e intento di AVP pa criminalisa e ayudo di FASE ta simplemente un cortina di huma pa desvia atencion for di e realidad. El a reafirma cu Aruba a logra sobrevivi e pandemia danki na decisionnan firme cu a keda tuma cu rapidez y curashi. Tromp-Lee a enfatisa cu, mientras AVP ta keda ancra den pasado buscando erornan administrativo den medio di un crisis mundial, e prioridad di MEP ta y lo keda e bienestar y siguridad di e pueblo Arubano.
.
