Dia 9 di februari 2026 nos ta para keto pa conmemora un fecha sumamente special den e historia politico di nos pais. Nos partido, Movimiento Electoral di Pueblo (MEP), ta cumpli 55 aña di existencia.
Como miembro orguyoso di e famia aki, mi kier comparti e alegria y e gratitud cu e aniversario aki ta trece cune.
Pakico nos ta sinti nos orguyoso?
Pa mas cu mey siglo, MEP no a djis ta un partido politico, si no e motor tras di e transformacion di Aruba. Nos tin hopi rason pa celebra cu orguyo. E lucha pa nos libertad sigur ta un di nan: MEP ta e partido cu a hiba e bataya pa nos logra nos Status Aparte. Danki na e vision di nos Libertador Betico Croes y e determinacion di MEP, awe nos tin nos propio identidad y autonomia.
Alabes como miembro di MEP mi ta orguyoso cu nos ta un partido resiliente y cu stabilidad: Durante 55 aña, nos a sa di nabega den temponan dificil, semper cu e meta pa proteha e bienestar di nos pueblo y percura pa un economia fuerte y sostenibel.
Mas cu claro mi ta orguyoso di por forma parti di un famia cu ta para pa husticia social: e curason di MEP semper tabata e ser humano. Nos orguyo ta bini di e lucha constante pa igualdad, educacion, y pa e derechonan di esnan cu mas mester di dje.
Na mes momento nos partido a conoce continuidad den liderazgo: nos a demostra cu nos por evoluciona cu tempo, manteniendo nos principionan firme mientras nos ta habri porta pa e generacionnan nobo cu kier traha pa e futuro di Aruba.
Un Compromiso pa Futuro
E 55 añanan aki no ta djis un mirada den spiel di pasado, sino un empuhe pa loke falta pa bin. Como miembro di e partido aki, mi compromiso ta keda firme pa sigui traha cu e mesun pasion y integridad cu a funda nos movemiento.
Nos ta celebra e historia skirbi pa nos prestigioso partido, y nos ta cla pa sigui traha riba e capitulo cu ta bini. Nos ta sigui para pa nos Status Aparte y pa ta Baas den nos mesun cas!
Masha pabien na tur lider, dirigente, militante y simpatisante di MEP!
