Dia 1 di April 2026, mi tabatin e placer di tene un reunion hopi positivo cu e directiva di Aruba Sport Unie (ASU), un organisacion cu e aña aki a cumpli 85 aña sirbiendo deporte na Aruba. Como Presidente di e Comision di Deporte den Parlamento, mi ta considera e dialogo cu e veld deportivo algo hopi importante y necesario. Pesey mes mi ta organisando un serie di reunion cu diferente stakeholders. A inicia cu COA y djei a continua cu ASU. Ainda riba agenda tin entre otro IBISA y FLPD.
ASU ta fungi como un pilar central, representando e interesnan di un total di 38 federacion deportivo. Durante nan presentacion, nos a elabora riba varios punto.
Mantencion di infrastructura sigur tabata e punto crucial den nan presentacion. Un di e puntonan mas relevante tabata e necesidad urgente pa mantencion di nos facilidadnan deportivo. Nos a discuti con por bin cu planificacion structural y kico ta necesario pa garantisa cu nos facilidadnan ta keda den bon estado y safe pa nos atletanan. Alabes nan a pidi nos atencion pa e facilidad Joe Laveist y e proyecto cu tabata di tuma lugar bou di e gobernacion anterior patras di e edificio ASU, caminda tin container yen di material pero a keda para pa motibo di falta di fondo. Nan a pidi Parlamento su intervencion den esaki serca Gobierno di Aruba.
Otro punto crucial cu nos a trata ta e sosten crucial cu ta keda duna na Federacionnan: Esaki ta mediante worksops, curso of charlanan. Ta concentra riba e necesidad pa duna apoyo tecnico, profesionalisacion, formacion di coachnan etc.
Mirando e cantidad di temanan y e importancia di e punto riba infrastructura, nos no a keda cla cu tur cos den un reunion. Pesey a keda palabra cu mi lo yama un vervolg vergadering pa nos por sigui profundisa den nan plannan y trata posibel solucionnan concreto pa nan retonan.
Na clausura di e reunion, mi a ricibi un bunita detaye: un pin special di ASU for di man di Sr. Moises Fernandez, miembro di Directiva di ASU. Mi conoce Moises desde aña 2002 y den transcurso di e añanan nos a traha hunto na hopi ocasion pa deporte na nos isla. Un en espcial cu ta Weganan di Reino. Mi kier a expresa mi mas sincero gradicimento pa e gesto y e atencion personal aki.
