Preocupacion y critica pa loke ta trata nos finansas publico y e ciclo presupuestario
Durante e tratamento di e prome Presupuesto Supletorio (OBW 2026) diabierna ultimo, 6 di november 2026, miembro di Parlamento pa fraccion di MEP, Shailiny Tromp-Lee, a expresa su fuerte preocupacion y critica pa e forma cu Minister di Finansas, Geoffrey Wever, ta atende cu e finansas publico y e ciclo presupuestario. Tromp-Lee a duna di conoce cu trata e prome presupuesto supletorio na luna di november ta un situacion alarmante y di lamenta. E documento aki ta mara na e realisacion y cambionan financiero di e prome mita di aña, algo cu normalmente Parlamento mester a atende y evalua den e periodo di voorjaar (prome cu e reces na juli).
Kico e retraso aki ta nifica en realidad pa nos pais y kico ta e peliger pa e ciclo presupuestario?
Segun e parlamentario, e tardansa aki ta nifica den practica cu Parlamento ta perde su derecho di control democrático. “Ora nos trata e presupuesto supletorio na november, e aña fiscal practicamente a termina caba. Parlamento ta wordo poni den un posicion unda e ta djis formalisa gastonan cu ya a caba di wordo haci of comprometi, kitando nos funcion di control preventivo,” Tromp-Lee a duna di conoce.
E parlamentario a recorda cu un maneho financiero sano ta exigi un evaluacion medio di aña pa adapta rumbo pa e segundo mita di aña. El a referi na e mocion presenta na 2018 cu a percura pa introduci e tussentijdse rapportages (Voorjaars- y Najaarsnota) y e presupuestonan supletorio medio y prome cu fin di aña: “Cos tabata bayendo masha bon y mester a mantene asina.”
Minister ta tira santo den wowo di pueblo
Tromp-Lee a desacredita e argumento di Gobierno cu a cumpli cu ley pasobra a entrega e Voorjaarsnota na mei: “Minister ta tira santo den wowo di pueblo. E Voorjaarsnota ta simplemente un documento informativo y no ta sustitui e obligacion legal di presenta un presupuesto supletorio pa Parlamento autorisa e cambionan. E prome presupuesto supletorio mes a wordo entrega te dia 21 di augustus 2026, y e Nota naar aanleiding van het verslag te dia 11 di oktober 2026. Motibo pa cual ta te den luna di november nos por a cuminsa cu su tratamento.”
“Cu e minister kier acepta e critica si of no, e realidad ta cu esaki no ta un situacion aceptabel ni deseabel,” Tromp-Lee a enfatisa. “Pa e minister bisa cu el a cumpli cu ley no ta kita su responsabilidad pa duna cuenta pa e tardansa aki. Durante tur e lunanan aki, Parlamento a keda sin e informacion necesario pa haci su trabou di control. Esey ta un echo y minister mester a informa Parlamento y pueblo con nos a yega akinan y kico ta bay haci pa percura cu esaki no ripiti su mes na 2027. Lastimamente esaki no a tuma luga durante e reunion publico”.
