Diadomingo, 23 di juni 2023, mi a asisti y participa na un actividad cultural organisa door di e Grupo di Baile Gucci Dancers na Centro di Bario Lago Heights. Gucci Dancers ta bou coordinacion di Rene Kock. Un persona cu ta stima su cultura y ta aporta grandemente na esaki.
![](https://solodipueblo.com/wp-content/uploads/2024/06/STL3-270624-768x1024.jpeg)
E actividad tabata yena di baile y canto. Tambe tabatin declamacion di poema y presentacion special di nos chikitinnan di e grupo di baile Nos Fofoti bou direccion di Juffrouw Popi. Highlight di e actividad tabata e shownan di coronacion y despedida, cu a culmina den diferente coronacion. Pa e ocasion special aki mi a keda invita pa corona e Prinsnan y Rey Cultural 2024. E siguiente cabayeronan a keda corona durante e actividad aki:
![](https://solodipueblo.com/wp-content/uploads/2024/06/STL-270624-1024x768.jpeg)
Baby Chikito Prins Cultural 2024 Gucci Dancers Aruba: Arvic Maduro
Baby Prins Cultural 2024 Gucci Dancers Aruba: Alexionne Sint Jago
Prins Chikitin Cultural 2024 Gucci Dancers Aruba: Misael Sabas
Prins Cultural 2024 Gucci Dancers Aruba: Iverson Allee
Rey di Cultura 2024 Gucci Dancers Aruba: Rene Kock
Mi mester bisa cu tur cu a keda corono a presenta un show masha bunita mes, cu canticanan na Papiamento cu a keda presenta yen di zjeito.
![](https://solodipueblo.com/wp-content/uploads/2024/06/STL4-270624-1024x768.jpeg)
Pero no tabata e cabayeronan so tabata centro di atencion. Tabatin show di bahamento di corona di Prenda.Cultural 2023: Crisbel Gutierrez y coronacion di Phylisha King como prenda Cultural Gucci Dancers Aruba 2024. Despues di e coronacion aki a sigui cu show di bahamento di corona di Dama Cultural 2024 Ashley Alberts y coronacion di Dama Cultural 2024 Gianimaris Croes.
Un atardi cultural familiar hopi bunita y mi a gosa con a cuminsa involucra nos mucha y hobennan masculino na actividadnan cultural. Tremendo idea di Gucci Dancers. Asina na un edad hopi jong ta planta e simia tambe cerca e mucha homber pa su cultura y pa e siña aprecia y stima loke ta di nos. Kita e berguensa pa participa na expresion artistico cultural.
Un pabien na tur cu a keda corona y tambe na Rene Kock y henter e famia di Gucci Dancers cu nan bunita actividad.