Recientemente mi a bishita Fundacion ABO pa mi checkeo di pecho y mi mester bisa cu e experiencia un biaha mas tabata excelente. E trahamento di cita a bay hopi liher. E dia di e cita tur cos a bay na ora y hopi liher tambe, y mi a keda atendi y asisti pa un ekipo masha profesional.
Mi mester remarca cu hopi biaha nos ta keda warda pa tuma accion. Esaki sigur ta conta pa mi tambe. Di fin di oktober mi a ricibi un WhatsApp di nan caminda nan ta avisami cu mi ultimo checkeo di pecho cu mi a participa na dje tabata mas cu 2 aña pasa. Alabes nan a urgi mi persona pa please tuma contacto cu nan pa traha un cita pero mi no a haci esaki mesora. Ta te siman pasa diahuebs ora mi a topanan na un Expo, un luz a sende den mi cabes y mi a acerca nan. Mesora nan a sugerimi pa haci un cita. Esaki a bay hopi liher y ya caba diaranson e siman aki e checkeo di pecho a tuma lugar.
Mi ta comparti mi experiencia pasobra mi ta consciente cu como parlamentario mi tambe por aporta na e parti di conscientisacion door di dedica extra atencion na e importancia di prevencion. Ora nos papia di cancer di pecho, deteccion na tempo ta clave, e por salba bida!
Mi ta haya super importante pa nos tur participa na e programanan di screening preventivo di Fundacion ABO pasobra e deteccion trempan aki ta vital pa nos tur. Mi kier conscientisa y stimula boso pa boso tambe participa. Haci bo salud bo prioridad pa 2026. Actualmente nan tin tres programa masha importante mes: (1) e conocido programa di BOB pa detecta cancer di pecho, (2) e programa nobo BOCA cu ta enfoca riba deteccion di cancer na boca di matriz cerca hende muhe, y tambe (3) CORESA, cu ta un programa nobo pa detecta cancer na tripa tanto cerca hende muhe como cerca hende homber.
Tuma accion y traha bo cita. Pone bo salud na prome lugar y trata bo mes como prioridad. Ta bay tin poster cu nan QR code na tur dokter di cas; esaki ta un manera nobo y masha facil pa registra bo interes. Unabes bo registra, Fundacion ABO lo tuma contacto cu bo pa traha bo cita, sin lista di espera y sin costo adicional pa bo persona. Si bo no por via e manera innovativo menciona, bo por yama Fundacion Abo na 588-1212 of mandanan un WhatsApp na 594-5020.
No laga pa mañan loke bo por haci awe pa bo bienestar. Screening preventivo ta un regalo di bida cu bo ta duna bo mes y bo famia. Ban cuida nos curpa, ban sea proactivo y ban haci 2026 e aña caminda nos salud berdad ta bin na prome luga. Bo ta bay haci bo cita?
