Como parlamentario, mi kier sigui informa y conscientisa pueblo di Aruba riba e cambio importante den nos leynan laboral cu a drenta na vigor entrante 1 di januari 2026, esta introduccion di un salario minimo pa ora.
E cambio di ley aki a keda trata y aproba pa Parlamento di Aruba dia 1 di september 2025. E tin como meta principal kita e desigualdad cu tabata existi entre empleadonan cu ta traha 40 ora pa siman y esnan cu ta traha mas cu 40 ora, pero cu no semper tabata wordo paga di manera husto.
Kico a cambia entrante 1 di januari 2026?
Tur empleado di 18 aña of mas cu ta cay bou di e ley di salario minimo, mester gana por lo menos Afl 11,58 pa ora, sin importa:
– si e ta traha pa dia, pa siman of pa luna;
– ni cuanto ora e ta traha;
– ni e tipo di funcion cu e ta eherce.
Esaki ta un paso importante pa garantisa cu tur ora di trabou ta wordo balora di manera igual.
Ahuste den calculacion
Ahuste den calculo di salario mensual
- E factor di calculo pa salario mensual a wordo ahusta na 4,333.
- Un empleado cu ta traha 40 ora pa siman, su salario minimo tabata Afl. 1.986,20 pa luna
entrante 1 di januari 2026 esaki ta bira Afl. 2.007,05 pa luna
Ken mester duna atencion na e cambio di ley aki?
Empleadonan y doñonan di trabou mester:
- conoce kico ta e salario pa ora real cu ta wordo paga actualmente;
- verifica si e salario ta abou di Afl. 11,58 pa ora;
- si ta asina, mester ahusta e salario obligatoriamente entrante 1 di januari 2026 na Afl. 11,58 pa ora.
- Empleadonan cu ta gana mas cu Afl. 11,58 pa ora no ta cay bou di e ley aki.
- Pa empleadonan cu tin un salario mensual di Afl. 2.257,93 of mas abou, ta importante uza e formulanan oficial pa determina si e ley ta aplicabel.
Con ta calcula bo salario segun e salario minimo pa ora?
Calculacion pa siman:
Cantidad di oranan pa siman × Afl. 11,58
Calculacion pa luna:
Cantidad di oranan pa siman × Afl. 11,58 × factor 4,333
Informacion y yudansa
Conforme mocion di Parlamento Gobierno a percura pa pueblo por haya mas informacion y asina por sa di su derechonan y doñonan di trabou di nan obligacion pa loke ta trata e cambionan den e ley di salario minimo.
Asina Departamento di Labor a desaroya diferente manera pa informa e clase trahado y e doñonan di trabou. Akibou ta sigui na ki manera bo por informa bo mes y si bo tin duda of pregunta semper por contact Departamento di Labor.
Departamento di Labor a bin cu SUELDO app caminda por uza e calculator cu por haya riba nan website pa calcula bo salario nobo, pa esaki por uza e siguiente link https://daoaruba.com/index.php/sueldo/
Tambe Departamento di Labor a traha riba e preguntanan mas haci y nan contesta. Por haya esakinan riba nan website y facebook: FAQ salario minimo pa ora. Nan website ta www.daoaruba.com.
Si ainda bo ta keda cu pregunta of duda por uza e informacion akibou pa tuma contacto of bishita Departamento di Labor pa informacion of Asistencia:
- Email: dao.uurloon@gmail.com
- WhatsApp: 593 6934 (solamente pa pregunta riba salario minimo pa ora)
- Telefon: 523 7720
- Oficina DAO: Paardenbaaistraat 11 (7:30–12:00 y 1:00–3:00)
Un peticion final
E introduccion di salario minimo pa ora ta un paso grandi pa mas husticia social, proteccion di empleadonan y dignidad di trabou. Como parlamentario mi a traha hopi duro pa nos logra e introduccion aki y pesey mes mi ta haci un peticion final na tur hende pa informa nan mes, comparti e informacion aki y haci uzo di e instrumentonan disponibel pa bo garantisa un pago husto segun e cambionan menciona.
