Dia 28 di oktober 2024 a tuma luga un dialogo constructivo entre Parlamento di Aruba y Fundacion Movemiento ta Bida, ganador di e prestigioso premio Appeltjes van Oranje 2024. Nos ta felicita Fundacion Movemiento ta Bida pa nan tremendo logro y pa e bunita trabou cu nan ta haci pa nos grandinan. E fundacion ta un ehempel inspirador di compromiso y dedicacion pa mehora e calidad di bida di nos grandinan.
Durante e reunion, Fundacion Movemiento ta Bida a presenta nan plan di trabou pa periodo 2025-2028, cu hopi enfoke riba cumpli cu e necesidaded y retonan cu nos grandinan ta enfrenta. Mi persona a expresa cu Presupuesto 2025 di pais Aruba no a keda trata ni aproba ainda y cu lo bay duna atencion na e retonan menciona durante e reunion y wak kico ta posibel pa incorpora ainda den e presupuesto pa 2025 dado caso esaki no a tuma lugar caba.
Mi ta lamenta cu solamente un miembro di oposicion tabata presente na e reunion, caminda a trata puntonan di importancia pa bienestar di nos grandinan. E falta di interes den un topico tan vital ta remarcabel, mirando cu e mesun miembronan ausente ta expresa cu bienestar di nos grandinan ta un prioridad pa nan.
Ta mi compromiso pa sigui traha pa yudansa y sosten na e comunidad di nos grandinan y pa busca hopi mas cooperacion pa sigui sostene e trabou valioso di fundacionnan manera Movemiento ta Bida.
