Den e program Interes di Pueblo dia 11 di januari Parlamentario Shailiny Tromp-Lee a elabora riba e rebaho substancial cu a keda anuncia pa Gobierno riba e tarifa di impuesto. El a elabora riba e cambio, su impacto y a comenta riba e grito di oponentenan encuanto e decision aki.
Un cambio cu tawata den tapara caba
Mirando cu ainda hopi hende no ta compronde of ta haci pregunta Parlamentario Tromp Lee a repasa kico e rebaho aki ta ensera. En corto e la indica cu sigur pa su persona e anuncio no tabata un sorpresa. Desde 2017 Gabinete Wever-Croes a bin ta traha riba reforma fiscal y ya a rebaha tarifa di impuesto den e trayecto aki. Gobierno a traha duro pa stabilisa nos finansas publico y crea espacio financiero pa inverti y tambe duna bek na nos hendenan cu pa hopi tempo a hala faha mara. Sigur e anuncio aki ta forma parti di e duna bek na comunidad y e meta di MEP pa bay di impuesto directo pa impuesto indirecto.
Kico e cambio ta exactamente?
E cambio anuncia y cu ta a drenta na vigor di biaha ta encera un reduccion di e tarifa actual di 10% pa 0%, cual ta nifica cu mayoria trahador lo bay paga menos inkomstenbelasting y loonbelasting den aña 2025. Entrante fin di januari 2025 hopi trahado lo bay ripara cu su doño di trabou lo bay wanta menos loonbelasting compara cu 2024 y asina nan lo keda cu mas placa den man ora cu cobra. Alabes door di e cambio den tarifa u grupo grandi di pensionado no lo paga impuesto mes mas.
E reduccion di impuesto entrante 1 di januari 2025 ta encera entre otro, cu e tarifa pa esnan cu ta gana mas cu 30.000 florin y menos cu 64.930 florin e tarifa a bira 0%. Dus banda di esnan cu ta gana 30.000 florin of menos, cual desde 2023 ya caba no ta paga impuesto, e grupo aki tampoco lo bay paga impuesto mas.
Alabes esnan cu ta gana mas cu 64.930 florin y menos cu 100.000 florin tambe lo bay paga menos mirando cu nan tarifa tambe a keda rebaha cu 4.5%. Esaki ta nifica cu lo paga 3.493 florin menos pa aña na impuesto, y lo ricibi 291.08 florin mas na salario.
Paralmentario Tromp-lee ta enfatisa cu tur doño di trabou mester aplica e tarifanan nobo ora di calcula e ‘zuiver voljaarsloon’ di nan empleadonan pa nan por paga menos impuesto entrante januari 2025.
Impacto di e cambio anuncia
Segun informacion cu Gobierno a anuncia e impacto di e anuncio aki ta grandi y hopi positivo pa e clase trahador, nos pensionadonan y pa nos famianan en general. Segun calculo di expertonan, door di e cambio, den 12 mil hogar lo tin un total di 16 mil persona cu no lo mester paga inkomsten- of loonbelasting mas. Den 9 mil hogar lo tin 12 mil persona cu lo bay paga menos impuesto. Pues un total di 28 mil persona lo ricibi un alivio fiscal cu e cambio anuncia. Pa loke ta trata pensionadonan, di e 19876 pensionado di SVB na Aruba, un total di 17484 pensionado no lo paga impuesto mas riba nan entrada, y 2392 lo sigui paga loonbelasting na un tarifa reduci.
Gritonan contra di opositornan
Opositornan por keda grita pero MEP ta keda demostra cu nos compromise ta cu bo y cu nos ta keda traha na bienestar di boso tur na un manera responsabel. E decision di e rebaho a keda tuma responsabelmente, ta forma parti di un proceso cu ta tumando lugar desde 2018 y ta abase di calculo y conseho di nos profesionalnan. Mas importante e ta na bienestar general di nos trahadornan, nan famia y nos grupo grandi di pensionadonan.
Ta bon pa pueblo sa tambe cu e decision aki ta responsabelmente tuma pasobra presupuestariamente nos por carg’e (20 miyon), nos ta keda cumpli cu nos normanan financiero stipula pa ley y gobierno ta cumpli cu su deber di mehora e poder di compra di su hendenan.
Pa finalisa Parlamentario a gradici y felicita Gabinete Wever-Croes, Minister Maduro y nos profesionalnan di DIMP y otronan cu a traha riba e proposicion aki y haci esaki posibel.
