Durante reunion publico tratando e Ontwerp-Landsverordening Instelling Ministeries (LIM) awe, mi a cuestiona e proceso y e contenido di e ley fundamental aki cu ta stipula e structura di e aparato gubernamental pa e proximo añanan.
Como parlamentario mi a exigi pa nos preguntanan keda contesta. Preguntanan esencial cu Gobierno a neglisha di contesta por escrito. Sigur durante e prome tanda di e reunion mi a enfatisa cu henter e proceso cu e concepto di ley aki a cana ta un “muestra di un falta di respet inacceptabel pa e democracia y pa e funcion cardinal di control di Parlamento.”
Falta di respet pa Parlamento
Mi a adverti contra un patronchi peligroso, causa pa Gobierno y tolera pa Vice-Presidente y Presidente di Parlamento cu ta mina autoridad di Parlamento:
- Parlamento a haya solamente 24 ora pa lesa, analisa, y haci pregunta riba e concepto di ley, 24 ora so compara cu e 10 dia cu a keda duna na 2022;
- No a tene cuenta cu 8 parlamentarionan cu tabata na reunion di Parlatino cu atendiendo otro reunionnan;
- Contesta superficial: Gobierno a contesta e 178 preguntanan di Fraccion di MEP mediante solamente 11 alinea di texto, nengando di contesta cada pregunta individualmente. Nan a “skirbi pa skirbi” y no a contesta e preguntanan di berdad;
- “Falta di Tempo” di parti Gobierno ta inacceptabel: Gobierno a skirbi sin ningun berguensa: “Vragen en opmerkingen waarop als gevolg van tijdsgebrek… in deze nota niet wordt ingegaan” (‘Pregunta y remarkenan cu como resultado di falta di tempo… no ta wordo contesta den e nota aki’).
Di unda ta sali cu Gobierno ta duna remarkenan asina? Riba dje nos no a haya tempo suficiente pa haci nos preguntanan y awor esunnan cu nos a haci no ta keda contesta debidamente. Asina tin hopi mas. Un falta total di seriedad y muestra di responsabilisacion.
Gobierno, y den cierto sentido Presidente di Parlamento cu ta coopera na esaki, ta trata Parlamento como un organo cu no merece e debido atencion y respet, y kier mina e credibilidad di henter e proceso legislativo. Gobierno ta debidamente informa cu Parlamento ta bay cu reces dia 19 di December y no a atende e 3 concepto di leynan cu prioridad y awor nos ta keda obsticulisa pa haci nos trabou di control manera mester ta.
Mi a urgi Presidente di Parlamento pa cuminsa para pa e organo di mas halto di e pais aki, y exigi respet. Gobierno mes ta laat, y Presidente di Parlamento mester a haci lo corecto, atende cada ley responsablemente y nos lo caba cu tratamento y votacion na inicio di 2026.
Presidente di Parlamento, irrespecto di cual partido e ta, mester ta esun cu ta percura pa respet y democracia reina den sala di parlamento. E ta esun cu mester percura pa duna e Parlamento e tempo y e cooperacion necesario pa eherce nos rol di control debidamente. Mas ainda un Presidente cu ta respeta democracia parlamentario sigur no ta cumpli cu peticion di Gobierno pa bulldoze 3 ley den 3 dia (mas sigur ta bira 5 dia), un di nan cu ta presupuesto di pais Aruba pa 2026, e ley mas importante cu nos ta trata aki den sala di parlamento tur aña!
Mi ta condena e falta di respet inaceptabel di Gobierno cu a duna Parlamento 24 ora so pa un ley fundamental, y a contesta 178 pregunta cu un excusa barata di “falta di tempo”. Esaki ta un patronchi peligroso cu ta mina e funcion di control. Si e pilar di control (esta Parlamento) ta keda destrui pa esunnan mes cu mester protege, kico ta e balor berdadero di e asiento cu cada parlamentario ta ocupa y di bo bos como pueblo?
