Minister Gerlien Croes a dicidi di no respeta e conseho di e Comision di Bezwaar di LAR. E comision a duna e fraccion di MEP rason y a declara e obhecion valido (gegrond), ordenando e minister pa reevalua su decision y duna e documentonan di e biahe di trabou realisa den un jet priva. Sinembargo, e minister a prefera di ignora e organo di conseho aki pa purba hustifica su nengacion di duna prueba.
E caso aki ta draai rond di e biahe di trabou cu Minister Croes a realisa den un jet priva pa Corsou riba dia 19 di november 2025. Na momento cu a pidi claridad y prueba di e gastonan y permiso di e avion, e minister kier ignora totalmente e peticion y a dicidi di pone un banda uzando un reglement nobo como excusa formal.
Falta di respet pa ley y falta di transparencia
E Comision di Bezwaar di LAR a conclui claramente cu e procedimento uza pa e minister no tabata legalmente corecto y cu e mester a reevalua e peticion. Na luga di respeta e conseho legal aki, e minister simplemente a sinta riba e decision: A declara e bezwaar “ongegrond” y ta ignora e conseho di e comision.
Minister ta purba hustifica cu e no tin pasagierslijst, contract, ni prueba di costo di e vuelo completo. E ta sigui nenga pa entrega e prueba di pago, alegando cu esaki ta cay bou di su “bida personal”, apesar cu tabata un dienstreis oficial.
Exigencia pa Responsabilidad y Integridad
Un minister tin e deber constitucional y moral di responsabilisa su mes na pueblo y duna transparencia total riba e uzo di recursonan y biahenan oficial realisa den su funcion. No ta acceptabel pa un mandatario sigui actua cu arogancia, nengando di contesta parlamentarionan y sin duna e pruebanan necesario. E actitud aki ta un violacion directo di e principionan di bon gobernacion, e ley di integridad y e gedragscode cu tur minister mester respeta y cumpli cu ne.
Presidente di Parlamento ta wordo yama pa trata e asunto grave aki mas pronto posibel den un reunion publico. Demas representantenan di pueblo no por permiti cu un minister ta ignora e organonan di conseho, ta kibra e reglanan di integridad y ta keda sin brinda transparencia na Parlamento.
A base di informacion duna pa e minister a bira hopi interesante pa nos haya sa ken a paga e resto di gastonan, cuanto nan a paga y na ken. Asina por descarta posibel conflicto di interes, y por keda stipula cuanto e posibel “regalo” na minister tabata. Mas cu claro no ta kita afo cu minister ta keda den e obligacion pa contesta Parlamento: cuanto e la paga, ki dia y na ken. Nos fraccion lo sigui tuma e pasonan parlamentario necesario pa garantisa cu e berdad ta sali na luz y cu e minister porfin lo rindi cuenta.
