Dia 17 di September 2024, hunto cu colega Setty Christiaans Yarzagaray, mi a asisti na apertura di e Global Travel Conference organisa pa Aruba Tourism Authority. Un conferencia cu ta trece partnernan principal di Norte America, Latino America, Europa y nos partnernan local hunto pa crea un plataforma pa informa, educa, dialoga, intercambia y experiencia pa asina logra multiple metanan. Sigur e conferencia ta brinda e posibilidad pa estrecha of crea lasonan na beneficio di nos pais.
Durante e mainta aki diferente tema, reto y of preocupacion a keda trata, manera experiencia autentico, “overtourism”, sostenebilidad, calidad di bida di nos hendenan, proteccion y conservacion di nos naturalesa y futuro di turismo di Aruba. Mi por bisa cu e presentacion di ayera mainta a impactami y mi ta kere cu e team completo a pensa bon encuanto futuro di turismo di Aruba. Sigur e direccion cu kier sigui enfatisa riba e concepto cu un Aruba dushi pa biba, ta un Aruba dushi pa bishita ta algo cu semper mi a kere den dje. Hopi enfasisa a keda poni riba con nos ta bay innova y transforma nos turismo. Mi ta sostene tambe e compromiso pa crea e balans necesario pa nos pais. E compromiso pa traha riba e experencia di nos turista enfatisando riba nos cultura, tradicion y nos norma y balornan. Mi ta haya esakinan hopi importante y ta sostene e direccion aki completamente.
Sigur “THE ARUBA EFFECT” presenta ayera cu ta para pa un sentido abrumador di felisidad cu ta bini di wordo ricibi den un experencia cu ta djis sinti… perfecto. Y e mihor parti? E ta keda cu bo hopi tempo despues cu bo bai. Introduciendo un version di un vakantie cu ta mas cu solo, lama y santo blanco. Banda di esaki a keda enfatisa cu lo sigui traha den e direccion di high value low impact caminda na Aruba nos ta para pa un turismo mas responsabel y sostenibel. Mi ta haya e presentacion den su totalidad sumamente positivo y den e dianan nos dilanti lo kier profundisa mi mes den loke tur ta bay ta e strategia pa logra esaki. A keda informa cu e no lo ta un campaña pero algo cu berdaderamente kier mira nos turista experiencia y transmiti.
Den pasado na mas cu un ocaccion mi a pidi atencion pa e balans aki. Un ehempel ta Alto Vista. Un lugar hopi importante pa mi y door cu mi tabata haya cu turismo ta impacta mi experiencia ora mi ta eynan negativamente mi a acerca tur stakeholders (misa, ministernan, ATA) pa nos bin cu un solucion. Awe poco poco ta mira cu tin progreso. Cu e situacion ta manera cu ami lo a desea no ta e caso ainda, pero hopi a keda haci si caba.
Sigur mi kier a felicita e team completo di ATA, Minister Dangui Oduber y tur otro cu a traha na e direccion nobo presenta pa loke ta trata nos industria turistico y con nos ta bay innova y transforma nos turismo. Mi mester bisa tambe cu nos a keda recorda tambe kiko tur ta e accionan cu Gobierno a tuma pa un turismo responsabel y sostenibel. Minister Oduber a splica con a introduci maneho nobo di permisologia di hotel cu lo bai reduci, mitiga y para construccionan di hotel. Tambe e la elabora riba e legislacion pa regula vacation rentals cu e la traha y cu ta na caminda pa parlamento. Mediante e legislacion aki Gobierno kier percura pa casnan na Aruba por keda pagabel pa nos futuro generacionan.
