Recientemente como Presidente di Comision di Finansas, Organisacion Gubernamental, Cultura y Deporte, mi a invita San Nicolaas Business Associations (SNBA) pa bin presenta y splica nan vision pa San Nicolas.
Na inicio di Aña Parlamentatio nobo 2025-2026 SNBA a entrega nan Vision pa San Nicolaas na tur lider di Fraccion den Parlamento. Pa es motibo a crea e oportunidad pa nan bin presenta esaki y asina miembronan di Comision por haci nan preguntanan. SNBA a bin cu un delegacion amplio cu a trata diferente topico manera area di refineria, transicion energetico y Aruba su posibilidadnan, centro di SN, viviendo pagabel, vision y proyectonan di Fundacion Savaneta.
Reunion a bay hopi bon pero nos tempo tabata limita. Pesey mes a palabra cu SNBA cu nos ta bay organisa reunionnan na inicio di aña 2026 pa trata cada topico individualmente.
