Diabierna, 27 di juni 2025, mi a asisti na e simposio titula “Stop Abuso Contra Adulto Mayor”, organisa pa Directie Ouderenzaken den conexion cu e Dia Internacional di Conscientisacion contra Abuso di Adulto Mayor.
E topico di abuso contra adulto mayor ta un asunto hopi delicado, preocupante y lamentablemente poco papia di dje den nos comunidad. E simposio a ofrece un mainta hopi interesante y informativo, cu a duna nos un mirada profundo riba diferente forma di abuso cu adulto mayor por enfrenta, y e impacto negativo cu e abuso aki tin riba e bida di e persona mayor. Pasobra realidad ta cu e actonan aki ta resulta den daño of angustia pa esnan di edad avansa.
E definicion y datos presenta, basa riba fuente di Organisacion Mundial di Salud (WHO), a pone cla cu abuso contra adulto mayor ta tuma luga den un relacion den cual tin confiansa y cu frecuentemente ta pasa sin cu nos ta ripara.
Mi ta aplaudi tambe cu durante e simposio a keda enfatisa cu tin manera pa preveni cierto abuso door di tin cierto aspectonan di bo bida regla oficialmente. Esta regla via un notaris ken mag y ta representa bo, ken mag atende cu bo asuntonan financiero etc.
Mi ta gradici e organisadornan pa e esfuerso pa trece claridad y conscientisacion riba un asunto asina importante pa nos comunidad. E simposio aki ta reafirma e necesidad urgente pa trata nos grandinan cu dignidad, respet y proteccion. Un bida liber di abuso no solamente ta un deseo, pero e ta un derecho humano fundamental.
Como Parlamentario mi ta reafirma mi compromiso pa sigui duna e topico aki atencion, door di aporta na mas conscientisacion den nos pueblo pa abusonan cu ta tumando lugar cu nos grandinan. Pasobra na prome instante mi no por a kere loke mi ta scucha pero mas ehempel tabata keda duna bo ta sinti un emocion fuerte di tristesa, preocupacion y asombro. Ta incomprendibel pa mi cu yiu(nan) of famianan por trata nan sernan keri asina. Pesey mes mester sigui promove debatenan publico y politico cu e meta pa logra proteha nos adultonan mayor.
Mi ta gradici Directie Ouderenzaken pa e invitacion y pa organisa e simposio aki. Alabes palabra di gradicimento na tur e expertonan cu a presenta y participantenan pa nan dedicacion y esfuerso pa pone e topico aki na un lugar prominente den nos agenda social y politico. Pasobra un bida liber di abuso ta un derecho humano.
