Parlamentario Shailiny Tromp-Lee ta enfoca riba e cambionan positivo den e ciclo presupuestario

Durante tratamento di e prome presupuesto supletorio pa aña 2024 mi a enfoca un biaha mas riba e cambionan positivo den e ciclo presupuestario. 

E aña aki pa di 2 biaha nos por mira cu Gobierno ta presenta un voorjaarsnota cu hopi informacion pa Parlamento, sigui despues pa un presupuesto supletorio mas trempan den aña. Esaki contrario na loke tabata custumber te cu na aña 2022. 

Mi ta haya hopi positivo cu e voorjaarsnota hunto cu e presupuesto supletorio ta keda traha y entrega den e prome mitar di aña y cu nos a cuminsa trata esaki diamars 25 di juni. E voorjaarsnota y e presupuesto supletorio ta bin banda di e najaarsnota y e presupuesto supletorio cu nos ta custumbra pa haya na fin di aña. E cambio aki sigur ta den liña cu loke nos como Parlamento number 10 a introduci na aña 2018, cu ta e tussentijdse rapportage, caminda ta yama Gobierno pa bin duna cuenta di e prome 6 luna di aña.

Mi a haya necesario pa un biaha mas enfoca riba e cambionan positivo den e ciclo presupuestario cu Gabinete Wever-Croes y Parlamento a percura pe, pasobra esaki sigur ta na beneficio di nos trabou mirando cu na tempo nos ta haya un bista encuanto cambionan economico, financiero y tambe den e maneho di cada ministerio. Esaki sigur ta brinda Parlamento e posibilidad pa haci miho uzo di su budgetrecht y tambe ta haci posibel pa nos por hiba e debate necesario cu Gobierno prome cu cierto cambionan tuma lugar. Asina Parlamento ta haya mas espacio pa influencia direccion y decision. Mas cu claro na mes momento nos ta brinda pueblo tambe mas transparencia riba con fondonan publico ta keda uza.

Antes Parlamento tabata haya e informacion aki te casi ora aña caba y sin tabata keda informa tussentijds pa por tuma decisionnan durante un aña y / of por aproba aumento di gasto of cambio di maneho. Den pasado Parlamento tabata haya presupuesto supletorio ora ya gastonan adicional y cambio di maneho a keda haci caba y no por a haci nada mas. Pueblo henter sa na kico e situacion aki a conduci bou di mando di AVP. Presupuestonan supletorio yena di deficit sin cu Parlamentarionan cu tabata sostene gobierno tabata haci algo (por ehempel na 2012 deficit di 443.3 miyon, 2013 un deficit di 332.8 miyon y na 2014 un deficit di 405.8 miyon). Anto awe nan tin curashi di cuestiona e transparencia y maneho financiero di Gabinete Wever-Croes cu ta dunando resultadonan hopi positivo pa nos pais.