Den un esfuerso pa haya claridad riba e pasonan cu Gobierno di Aruba ta tumando pa proteha e pueblo contra e consecuencianan economico di e conflicto den Medio Oriente, Parlamentario Drs. Shailiny Tromp-Lee a manda un serie di pregunta formal di urgencia pa Prome Minister Mike Eman y Minister Geoffrey Wever. Tromp-Lee ta califica e silencio actual di Gobierno como “incomprendibel y inacceptabel.”
Peticionnan sin contesta
E Parlamentario a recorda cu for di dia 3 di maart ultimo, Fraccion di MEP a pidi un reunion cu Gobierno (bou di number di registro IS/658/25-26) pa haya informacion, pero te na e momentonan aki no a haya ningun oido. “Desde 28 di februari e situacion den Medio Oriente a empeora y e impacto ta keda sinti rond mundo. Mientras otro paisnan den Reino ta brindando trankilidad y informacion na nan hendenan, aki na Aruba e unico cos cu nos a tende den prensa ta e aumento di prijs di gasolin y diesel,” Tromp-Lee a expresa.
Tromp-Lee a haci diferente preguntanan pa haya e informacion necesario Ta trata preguntanan over informacion di comision encarga cu e inventarisacion di e impactonan di e guera actual pa Aruba, kico nan tarea specific ta, pa ki fecha nan mester entrega un informe final na Gobierno y e peticion pa Gobierno percura pa comparti cu Parlamento e resultado di trabou asina cu esaki ta cla.
Alabes den su carta, Tromp-Lee ta exigi pa sa si WEB Aruba N.V. tin contractonan di “hedging” activo pa petroleo y pa cuanto tempo esaki ta proteha e tarifanan di awa y coriente. “Pueblo mester sa si tin un plan pa frena e aumentonan ey of si Gobierno tin pensa di subsidia e brandstofclausule temporalmente pa evita cu e costo di bida ta sigui subi drasticamente.” Otro aspecto cu ta keda trata ta si Gobierno tin planea pa absorba parcialmente e subidanan di prijs di combustible, por ehempel door di reduci temporalmente e accijns. Por tuma cu e carta dirigi na gobierno ta atende diferente otro topiconan caminda Tromp-Lee ta pidi atencion pa entre otro siguridad alimentario y agricultura, control di prijs y inflacion y ta termina cu un analyses compartitvo mundial.
Mester remarca cu Tromp-Lee kier sa di Gobierno kico ta e plannan concreto segun diferente scenario, e kiersa kico Gobierno tin in place pa proteha e cartera di nos hendenan, principalmente esnan mas vulnerabel. Mas cu claro nos por tuma nota den su carta cu Tromp-Lee ta urgi Gobierno pa percura cu Parlamento por haya e plannan concreto mas pronto cu ta posibel
Finalisando Tromp-Lee ta enfatisa cu e ta haya e falta di transparencia di parti Gobierno incomprendibel y inacceptabel y ta haci e siguiente pregunat: “Pakico Gobierno di Aruba ta keda den un silencio total mientras paisnan bisiña den Reino ya a comunica nan strategianan di mitigacion na nan hendenan. Mi ta di opinion cu si paisnan cu tin nan mesun fuente di energia y produccion manera Merca y Union Europeo ta preocupa, ta con por ta posibel cu Aruba cu ta practicamente 100% dependiente di tur cos, por permiti su mes e luho di un silencio total.
Pesey mes e ta urgi pa Gobierno pa asumi nan responsabilidad y cuminsa brinda transparencia, claridad y mas cu tur cos trankilidad.
