Durante e actividad Light It Up Colourfull, mi a keda invita pa representantenan di e Fundacion Hoofs of Hope, Zulaika y Amy, pa bishitanan durante nan actividad diasabra ultimo. Tabata un session special di Hippotherapy, caminda a pone den luz e trabou valioso cu e fundacion aki ta realisa den aliansa cu Sensory Gym Aruba.
E cooperacion aki ta enfoca riba e transformacion di bida di nos muchanan cu autismo den aire liber, brindando nan hermentnan unico pa nan desaroyo.
E mainta tabata dedica na e progreso fisico y emocional di e muchanan a traves di e contacto cu cabay. Como invitado di Hoofs of Hope, mi por a presencia di cerca e impacto positivo di e terapia aki.
Un momento masha special tabata e session di training di Joshua, kende a demostra cu hopi focus con e conexion cu e cabay ta yud’e den su concentracion y habilidadnan motorico. Pa Joshua, e tempo dedica na e training aki den e arena ta un paso grandi den su desaroyo personal. Sigur pa mi tabata hopi special di por a experiencia Joshua aai e cabay, bras’e y carisia su cara. Un momento di puro contacto, caminda mi por a mira e alegria cu Joshua tabata sinti.
E sessionnan di Hippotherapy ta consisti di weganan deportivo ariba e cabaynan pa fortifica e balansa y e seguridad propio. Maske e programa completo ta inclui tambe e parti psychomotorisch unda e muchanan ta baña e cabaynan pa stimula nan sentido di cuido y empatia, e training di Joshua a resalta pa su determinacion y e conexion cu e animal durante e movementonan di terapia.
Mi ta hopi contento di por a experiencia e training aki y conoce un tiki mas di cerca ambos organisacion, combersando tambe basta cu Jeanjare di Sensory Gym, kende ta fungi como instructor hunto cu e tres asistentenan di Hoofs of Hope: Amy, Zulaika y Claudia.
“Together we can make a difference, together we’re doing it”, ta e lema cu a resona durante e mainta, recordandonos cu cada session ta un oportunidad nobo pa inclusion y pa duna nos muchanan cu autismo e espacio pa briya.
Pa mas informacion over di e programanan di terapia cu cabay, por tuma contacto cu Hoofs of Hope na e number 742-7079 of cu Sensory Gym na 562-3125.
Mi ta termina cu un palabra di gradicimento na Hoofs of Hope pa e oportunidad brinda y na e mayor di Joshua cu a laga mi presencia, experiencia y saca potret di e session di Joshua. Un danki di curason. Sigur e bishita ta pas den e meta cu mi a pone pa mi mes, pa via comunicado, post y bishitanan, pa duna contenido real na e parti di luna di conscientisacion riba autismo.
