Parlamentario di AVP Stephany Sevinger ta considera cu e resultado inicial di e programa Aruba Limpi ta confirma cu Aruba tabatin un necesidad urgente di crea un sistema organisa pa maneho di desperdicio. Sin embargo, no mester mira e iniciativa como un solucion temporal, sino como e prome stap den un vision nacional pa un Aruba mas limpi, mas saludabel y mas sostenibel.
“Ora nos ta papia di desperdicio, nos no ta papia solamente di sushi, mata of matras bieu. Nos ta papia di con nos ta cuida nos pais, nos comunidadnan y e calidad di bida di nos pueblo,” Sevinger a declara. Segun e parlamentario, e problema di desperdicio ilegal no a nace awe ni e ultimo añanan. Ta un reto cu durante hopi tempo a sigui crece y cu finalmente tabata pidi un accion decisivo.
“Tur hende a mira e situacion. Tur hende a mira desperdicio bandona den mondi, den bario y banda di caminda. Aruba no por acostumbra cu esey.” Sevinger a señala cu e cifranan presenta durante e debate parlamentario ta mustra cu e necesidad tabata real. Den solamente e prome luna di implementacion, mas cu 3.180 ciudadano a haci uzo di e facilidad, resultando den mas cu 642 ton di desperdicio recogi y 479 biahe di transporte. “642 ton no ta solamente un number. Esaki ta miles di articulo cu awor no ta contamina nos bario, nos mondi y nos paisahe.”
Aunke e parlamentario ta mira positivamente cu gobierno a tuma accion, e ta considera cu Parlamento tin e deber di sigui exigi transparencia y planificacion. Entre e preguntanan cu Sevinger a plantea durante e debate ta e evaluacion tecnico cu a conduci na e decision pa no laga SERLIMAR ehecuta e proyecto, e base di e presupuesto destina pa promocion di e campaña y e mecanismo cu lo preveni pago atrasa cu por genera interes innecesario pa gobierno. “Transparencia no ta obstaculisa progreso. Transparencia ta fortalece confianza den e decisionnan cu nos ta tuma.”
Pa Sevinger, e punto mas importante ta cu Aruba no por conforma su mes cu un contrato di solamente un aña. “Mi kier mira un vision cu ta bai mucho mas leu cu e solucion inmediato. Si den cinco aña nos ta move e mes cantidad di desperdicio, esey kiermen cu nos no a resolve e problema.”
P’esey, e parlamentario ta haci un yamada pa elabora un Plan Nacional di Maneho di Desperdicio, cu inclui metanan cla pa reduci desperdicio, fortalece reciclahe, modernisa infraestructura y amplia e rol di SERLIMAR den futuro.
Segun Sevinger, un sistema moderno di maneho di desperdicio no solamente ta beneficia medio ambiente, sino tambe salubridad publico, atractivo turistico y calidad di bida den tur comunidad. “Un Aruba limpi no ta solamente bon pa e bishitante. Primeramente, e mester ta bon pa e mucha cu ta hunga den su bario, pa e famia cu ta biba aki y pa tur ciudadano cu kier sinti orguyo di su pais.”
Na conclusion, Stephany Sevinger a expresa cu e programa Aruba Limpi mester wordo mira como un punto di salida pa un vision mas ambicioso. “Nos no mester keda contento cu djis haci Aruba limpi awe. Nos mester crea un sistema cu ta mantene Aruba limpi pa e siguiente generacionnan. Esaki ta e compromiso cu nos pueblo merece.”
