Na ocasion di Dia Mundial di Turismo 2025, miembro di Parlamento pa AVP, Stephany Sevinger, a comparti un mensahe inspiracional riba importancia di turismo pa Aruba y, mas importante ainda, riba balor di nos pueblo cu ta carga e sector aki dia tras dia.
Reflexionando riba e fecha, Sevinger ta pensa cu hopi paisnan ta celebra number y estadistica, pero pa Aruba, e historia ta mas profundo. “Nos ta bendiciona cu solo, playa y awa bunita, pero e berdadero tesoro cu ta haci Aruba un destino unico, ta nos mes pueblo. Ta nos hende cu ta duna bida y calor humano na turismo,” el a bisa.
E kier recorda cu turismo ta un motor economico, pero un motor no ta core riba su mes. Pa move, tur pida chikito y grandi mester traha hunto. Den turismo, esaki ta e hende: e empleado di hotel cu su sonrisa, e taxista cu su historia, e chef, e piscado, e guia turistico, henter personal di mantencion y limpieza. “Nan ta e piesa vital cu ta move Aruba aden,” segun Sevinger.
Tambe e ta probecha di duna un palabra di gratitud profundo na tur cu ta traha den sector, reconociendo sacrificio di trabou largo, marduga y anochi, cu sonrisanan hasta den cansancio. “Danki pa bo entrega y pa ta e berdadero embahado di Aruba,” el a expresa.
Pero Sevinger a enfatisa cu gratitud so no ta basta. Prosperidad di turismo mester yega den cas y mesanan di tur trahado, pa nos hoben por soña mas grandi y pa famia por biba miho. “Turismo no por wordo midi solamente den cifra, mester wordo midi den dignidad, husticia y oportunidad,” el a agrega.
E parlamentario di AVP a splica cu futuro di turismo tambe mester orienta riba sostenibilidad, innovacion y respeto pa nos medio ambiente. E a destaca cu cuido di nos playa, nos mar y nos cultura ta fundamental pa mantene turismo fuerte y pa asina por keda atrae generacionnan cu ta bin.
Finalmente, Sevinger a haci un yamada pa sigura cu turismo no ta un storia di ganashi sin pueblo, sino un refleho di husticia y bienestar pa nos tur. “Futuro di Aruba ta pertenece prome cu tur na esunnan cu ta biba aki. Si nos ta cuida nos pueblo, nos isla lo sigui briya mas fuerte.”
