Parlamentario Xiomara Maduro ta critica e reaccion di minister-president Mike Eman riba e progreso di e Rijkswet HOFA, manera a keda publica den un comunicado di Ministerio di Relacion Interno y Asunto di Reino di Hulanda dia 6 di maart ultimo.
Segun Maduro, ta inaceptable cu un gobierno cu ta gaba e 40 aña di Status Aparte awo ta celebra un ley cu ta bay duna Hulanda mas influencia riba finansas di Aruba.
“Celebra Status Aparte mientras ta entrega autonomia na Hulanda, ta un burla pa e pueblo Arubiano,” Maduro a declara.
Maduro ta enfatisa cu decisionnan riba presupuesto, deuda y futuro economico di Aruba mester keda den man di Parlamento di Aruba, y no den man di Tweede Kamer na Hulanda.
Ademas, Maduro ta recorda cu Aruba ya caba tin un marco legal pa supervision financiero, introduci na 2015 cu ta e Landsverordening Aruba Tijdelijk Financieel Toezicht, cu a establece control riba finansas publico di Aruba.
“Aruba ya tin su propio reglanan pa mantene finansas na orden. No tin ningun motibo pa duna Hulanda e ultimo palabra riba asuntonan cu ta trata Aruba,” Maduro a enfatisa.
Segun Maduro, e pregunta cu pueblo Arubiano mester haci awor ta simpel: “Si Hulanda ta dicidi riba nos finansas, e ora pakico nos pueblo a lucha pa Status Aparte?”
Maduro ta haci un yamada na Parlamento y na pueblo Arubiano pa para firme den defensa di autonomia di Aruba. “Status Aparte no ta pa celebra un dia y despues entrega paso pa paso. Autonomia di Aruba no ta pa regala den teblachi manera Eman, Gerlien y Geoffrey ta haciendo.”
