Parlamentario Xiomara Maduro: Atencion pa Aruba su Status Aparte ta mas necesario cu nunca; Apelacion pa mas instancia dedica atencion na e 40 aña di Status Aparte di Aruba

Durante e discurso den Parlamento, Parlamentario Xiomara Maduro a trese un fuerte apelacion pa honra, reflexiona y conserva Aruba su Status Aparte den e marco di 40 aña di existencia di Aruba como Pais. Segun Maduro, esaki no ta solamente un aniversario simbolico, sino un momento crucial pa mira e desaroyo di nos Pais, y pa reafirma e lucha pa autonomia cu tabata e base di e desaroyo di Aruba cu awe nos tur conoce.

Raad van Advies: “Un organo cu a desaroya hunto cu nos democracia”

Parlamentario Xiomara Maduro ta expresa su gratitud na Raad van Advies cu ta bay pone enfasis riba e 40 aña di Status Aparte durante nan Masterclass. Raad van Advies tambe ta bay cumpli 40 aña di existencia, y mescos cu Aruba su democracia a madura, e instancia consehero aki tambe a desaroya y profesionalisa. “Ta bunita pa e desaroyo aki wordo presenta na Pueblo, pa tur hende por compronde con e instan­cia aki a evoluciona hunto cu nos democracia,” Maduro a expresa.

Un apelacion na tur Colegio Halto di Estado

Den su discurso, Parlamentario Maduro a pidi pa e celebracion di 40 aña Status Aparte no keda limita na un par di instancia, pero pa tur Colegio Halto di Estado, manera Algemene Rekenkamer y Parlamento, tambe tuma un rol activo pa informa Pueblo. “Status Aparte tabata un lucha historico pa auto-determinacion. Ta fundamental cu nos Pueblo, y specialmente nos hobennan, compronde e balor di e lucha aki, y con ela forma nos Pais, nos economia y nos identidad,” Maduro a agrega.

Reaccion duro contra comentario di MinPres Eman

Parlamentario Maduro tambe a expresa su preocupacion tocante comentario di MinPres Eman over “Wet van de Sterkste,” cu ta manda un señal peligroso tocante e defensa di autonomia di Aruba. “Esey kiermen cu Eman no tin pensa di defende Aruba su autonomia? Cu e ta laga otro trapa riba nos? Sin e lucha di nos Status Aparte, awe Aruba no lo tabata tin MinPres, y tampoco Colegionan Halto di Estado. Libertad no ta pa negosha, libertad bo ta exigi,” Maduro a declara, y ta insisti cu MinPres Eman mester para duro pa defende Aruba su autonomia, hasta si esaki ta nifica para contra su mesun coleganan di coalicion.

Nos a bira Pais na 1986. Awe nos mester conta e historia cu a trece nos te akinan

Maduro a cera su discurso pidiendo un momento pa reflexion colectivo: “Nos mester contempla kico nos a construi den e 40 aña di Status Aparte. Kico ta tene nos hunto, y kico ta duna nos e sentimiento di pertenencia na Aruba.”