Parlamentario Xiomara Maduro ta felicita tur pensionado cu e fin di luna aki ta bay cobra 250 florin extra na Reparatietoeslag. Como ex Minister di Finansa, Parlamentario Maduro ta mira e fruta di su trabou grandi haci den ekipo pa drecha finansa publico di Aruba, atende cu un pandemia y logra crea espacio financiero den un surplus di cual por duna pensionadonan na Aruba un subida di 250 florin extra riba e 200 florin cu ya caba ta wordo duna na pensionadonan.
Mester bisa si cu e promesa politico cu Mike Eman a gana den eleccion cune ta pa duna TUR pensionado 700 florin y no 250 florin, pero lamentablemente Eman a haci promesa sin calcula si Gobierno tin placa pa cumpli cu e promesa aki. Pa scapa cara Minister Eman a declara cu ta MEP a laga un presupuesto atras cu no tin suficiente placa pa paga e 700 florin, ya cu MEP a baha loonbelasting y asina ki ta reduci entrada di Gobierno y ta stroba e Gobierno di AVP FUTURO pa paga e 700 florin na e pensionado.
Aki ta unda Parlamentario Maduro kier aclarea cu e rebaho di e loonbelasting cu awe gran parti di Pueblo y un grupo grandi di pensionado ta disfruta di dje, a costa caha di Gobierno 26 miyon florin. Un suma cu facilmente por wordo paga di un surplus di 500 miyon florin cu e Gobierno di MEP ta laga atras. Sinembargo e promesa di Mike Eman pa duna 700 florin na tur pensionado ta costa minimo 182 miyon florin. Y ya cu cada aña ta bin 900 pensionado acerca, e suma di 182 miyon florin ta keda crece cada aña y hopi lihe e gastonan ta surpasa 200 miyon florin pa aña pa por cumpli cu e promesa aki di Mike Eman. Ta sumanan bastante grandi cu Gobierno no lo por paga, ya cu tin debe y otro gastonan pa paga.
Di tur manera Parlamentario Xiomara Maduro ta contento cu danki na e trabou duro di MEP y e surplus di 500 miyon florin laga atras, awe pensionadonan por haya 250 florin extra den nan cartera.
