Ora un bon maneho financiero wordo hiba, e Pais tin espacio fiscal, tin placa, pa por paga gasto y debe, inverti den Pueblo y tambe duna incentivo fiscal pa incentiva comercio. Awe un biaha mas pueblo por mira e resultado di e trabou responsabel di Gabinete Wever-Croes, ya cu Gobierno di AVP FUTURO tin placa pa por introduci incentivo fiscal pa beneficia comercio den Playa y San Nicolas.
Den Playa y San Nicolas comercio ta paga menos belasting
Minister Wever di Finansa a splica Parlamento riba incentivonan fiscal cu ta drenta na vigor na comienso di 2026. Entre nan, tin incentivo dirigi riba maneho di propiedad inmobiel (real estate) den centro di Oranjestad y San Nicolas. Comerciantenan lo por cumpra y bende real estate, y haci negoshi den e zona aki sin cu mester paga mesun hopi belasting manera comerciantenan den otro districto na Aruba. Segun Minister Wever, e kier beneficia e comerciantenan den Playa y San Nicolas door di laga nan paga menos belasting, pa asina nan por haci negoshi y trece bida atrobe den Playa y San Nicolas.
Parlamento mester habri wowo y tira bon bista
Aunke nos tur kier mira mas movecion den centro di Oranjestad y San Nicolas, Parlamento mester habri wowo si y tira bon bista riba e uzo di e beneficio fiscal aki. Dicon? Pasobra cu AVP den gobierno ya nos TUR por a mira con un grupo di comerciante liga na partido AVP a bira miyonario haciendo maluzo di tereno publico. E biaha aki Parlamento lo mester evita cu Pueblo su placa ta bay atrobe pa financia negoshi miyonario pa un grupo selecta den e circulo di AVP. “Nos a traha hopi duro pa Aruba por tin placa pa beneficia FUL Aruba, y lo ta un berdadero lastima si e incentivo fiscal aki bay atrobe den saco di algun “lucky few” liga na partido AVP,” ta preocupacion expresa pa Parlamentario Xiomara Maduro.
