Parlamento di Aruba a ricibi recientemente e Secretariado di e Colegio di Supervision Financiero di Aruba (CAft) pa un encuentro unda nan por a cera conoci cu e Parlamento nobo y hiba un dialogo tecnico. Parlamentario Xiomara Maduro, ta cualifica e encuentro aki como un oportunidad valioso pa Parlamentarionan nobo por siña mas tocante e manera di traha di CAft y tambe haya un bista di e retonan y oportunidadnan financiero pa Aruba.
Durante e encuentro, CAft a duna un splicacion di su rol como supervisor financiero riba e finansa publico di Aruba, y a splica nan strategia pa e añanan venidero. Pa e periodo 2024–2026, CAft ta enfoca pa yuda fortifica e resiliencia financiero di Aruba pa cual ta importante pa baha e nivel di debe y reduci e gastonan di interes cu ta pisa hopi riba e presupuesto nacional.
CAft tambe a pone enfasis riba e necesidad pa Gobierno entrega y Parlamento aproba e presupuesto na tempo, y pa Gobierno duna reportahe financiero bon, completo y na tempo. E Secretariado a indica cu un evaluacion realistico di e risiconan financiero tambe ta necesario pa por hiba un maneho financiero sostenibel.
CAft a indica cu nan ta dispuesto pa duna apoyo na Parlamento pa den encuentronan tecnico por haya splica nan recomendacion y consehonan duna na Gobierno. Parlamentario Maduro ta gradici CAft pa e encuentro:
“Como Parlamentario di Aruba, nos tin e responsabilidad pa controla e presupuesto y e maneho financiero di Gobierno. E splicacion di CAft ta yuda pa Parlamento por cumpli cu e trabou cu mas conocemento y seriedad,” segun Maduro.
E encuentro a enfatisa e importancia di cooperacion, transparencia y disciplina financiero, tur elemento esencial pa un maneho financiero sostenibel pa Aruba.
