Parlamentario Xiomara Maduro a presencia e presentacion di e buki Echoes of Africa, di autor Bob Harms, na Archivo Nacional Aruba. Un obra cu ta invita nos pa profundisa den e influencia di tradicionnan spiritual Afro-Crioyo riba identidad cultural di Aruba, Corsou y Boneiro.
E investigacion di Bob Harms ta pone luz riba un parti di nos historia cu durante hopi aña no a haya suficiente atencion. Tradicionnan, creencianan y conocemento di nos antepasadonan cu a pasa di generacion pa generacion, pero cu frecuentemente a wordo interpreta como supersticion of hasta practica negativo.
E buki ta explora con herencia Indigena, Africano y Europeo a mescla y contribui na formacion di nos identidad cultural. Practicanan manera curacion tradicional, uzo di mata medicinal, ritualnan di despedida y e tradicion di Ocho Dia ta forma parti di e herencia aki.
Pa Parlamentario Maduro, e balor di e investigacion ta bay mas leu cu solamente documenta custumbernan di pasado.
“Nos cultura no ta solamente loke nos por mira den un museo of lesa den un buki di historia. E ta tambe e sabiduria di nos antepasadonan, nan creencianan, nan manera di biba y nan forma di enfrenta bida y morto. Si nos no documenta esakinan, nos ta core riesgo di perde un parti importante di nos identidad.”
Maduro ta enfatisa cu investigacion y documentacion cultural ta esencial pa preserva nos memoria colectivo. E ta permiti generacionnan futuro compronde miho di unda nos ta bin y con diferente influencia cultural a forma e Aruba di awe.
E presentacion na Archivo Nacional Aruba ta subraya tambe e importancia di institucionnan cu ta conserva, investiga y haci nos patrimonio historico accesibel pa comunidad.
“Un pueblo cu conoce su historia ta un pueblo cu por aprecia su identidad. P’esey nos mester sigui stimula investigacion, documentacion y publicacion di nos patrimonio cultural, specialmente e partinan di nos historia cu ainda no a haya e reconocemento cu nan merece.”
Parlamentario Maduro ta felicita Bob Harms cu su contribucion na documentacion di nos herencia cultural y ta expresa su aprecio pa tur iniciativa cu ta yuda preserva e rikesa di nos historia.
“Cultura bo tin cu bib’e, pero tambe document’e pa generacionnan cu ta bin.”
