Durante tratamento di e Prome Cambio di Presupuesto 2025, Pueblo por a scucha e plegaria di Parlamentario Sevinger den cual e ta trece su frustracion dilanti como un hoben cu un salario decente, pero cu no por haya un tereno of un cas pagabel na Aruba.
Un preocupacion cu ta biba cerca hopi hoben na nos Pais, cu no por logra nan soño di nan propio cas, ya cu casi no tin tereno of cas pagabel mas na Aruba.
Locual e hoben Parlamentario Sevinger awe mester realisa ta, cu esaki ta e legado cu su propio tata Benny Sevinger a laga pa e hobennan di Aruba, incluso su mesun yiu. Como Minister di Infrastructura, Benny a haci deshaci cu tereno pa saca probecho y awe un cantidad grandi di hoben ta sali perhudica. Leoncita so a haya 90.000 meter cuadra di tereno pa saca probecho, sin conta e centenares di tereno cu amigo y sponsernan di Benny a haya pa traha condominium, hotels, cas pa huur cu airbnb etc etc, cu awe ta stroba hobennan di haya un tereno of un cas pagabel na Aruba.
Tabata na su introduccion den e arena politico na Aruba, cu Stephany a vocifera cu elo sigui cu e legado di su Tata, pero awe e tambe mester realisa cu e legado eynan ta un desaster cu ta perhudicando tanto hoben na Aruba, incluso su mes, di yega na un tereno of cas di nan soño.
