Parlamentario mr. Xiomara Maduro, miembro di fraccion di MEP, a expresa su preocupacion durante e programa radial “Interes di Pueblo” riba Top FM 95.1 diasabra ultimo tocante e lekmento di informacionnan di screening di candidatonan pa bira minister. Maduro a enfatisa cu ta sumamente straño con informacion asina delicado, manera esun di Mike de Meza, ta yega caya prome cu e proceso oficial. Segun ley, solamente tres persona ta ricibi e informacionnan aki: e dos formadornan y e Gobernador. E situacion aki ta lanta preguntanan serio tocante e integridad di e proceso y con e informacion confidencial aki por a bira publico.
Maduro a subraya cu e historia di Mike de Meza cu problemanan di belasting no ta algo nobo pa pueblo di Aruba. El a recorda e caso di 2009, caminda de Meza, como e tempo ey Minister di Finansa, tabatin problema cu belasting relaciona cu Valero. E caso ey a bay corte, y hues a determina cu de Meza a abusa di su poder.
