Durante e reunion publico pa trata e Prome Cambio di Presupuesto 2025, tur hende por a scucha Eman desaproba e cambio cu a wordo haci na comienso di aña 2025 pa duna miles di hende un alivio den forma di un rebaho di loonbelasting. Segun Eman, e cambio aki a costa 50 miyon florin y lo tabata miho pa a uza e placa aki pa otro cos.
E realidad ta cu e rebaho di loonbelasting a costa 26 miyon florin y ela brinda un alivio na miles di pensionado. Banda di esaki e cambio ta haci posibel pa 16 mil persona no mester paga loonbelasting mas, y pa 12 mil persona paga menos na loonbelasting. Ta trata di un alivio grandi cu e clase media incluso pensionado na Aruba ta haya.
Ta lamentabel pa constata un biaha mas, cu Minister Eman no ta contento cu e alivio aki cu MEP a duna na e clase media di Aruba. Eman no ta tene na cuenta cu ta e clase media ta e grupo cu ta sostene nos economia. Nan ta paga belasting, nan ta traha, ta inverti den traha cas, den lanta negoshi chikito, etc y ta mantene nos comunidad para riba su pia. Mike Eman ta lubida cu ta e clase media ta paga p’e por bay chapi den bario, haci bishita pa brasa y sunchi, y parti placa y toeslag.
Locual Eman ta prefera ta, pa e clase media incluso pensionado cu dos pensioen, keda paga belasting halto y bay den pobresa. Eman su meta den politica ta pa crea pobresa den e clase media aki, pa asina nan por keda depende di e toeslag cu Eman por brinda nan a cambio di nan voto, pa asina e por keda na poder. Un vision politico cu ta perhudica Aruba su comunidad grandemente y pesey mester wordo cuestiona y desaproba.
