Siman pasa diabierna Pueblo di Aruba a wordo sorprendi cu e noticia cu AVP FUTURO a entrega un concepto pa e Ley di Reino riba supervision financiero, Rijkswet HOFA, na Rijksministerraad.
RMR ta dicidi prome cu Parlamento
Fuera di esaki e asombro tabata mas grandi, ya cu riba e mesun dia Rijksministerraad a bay di acuerdo tambe cu e proposicion di AVP FUTURO. Dus prome cu e reunion a tuma luga den Parlamento na Aruba, ya caba Conseho di Minister di Reino Hulandes na Hulanda a tuma desicion riba algo cu ningun hende na Aruba tabata sa di su contenido.
A haci cos scondi pa Pueblo
E manera aki di traha den scondi, negosha den scondi, manda informacion den scondi pa Hulanda y laga Rijksministerraad tuma desicion scondi pa Pueblo di Aruba, ta “totally not done” y un falta di respet hopi grandi pa e Pueblo Arubano. Tipo di acuerdo asina cu Hulanda, mester a wordo splica debidamente PROME cu a manda concepto di Rijskwet pa Hulanda pa su aprobacion.
Mas di 3 siman tur informacion ta conoci
Ta hopi lamentabel pa mira e falta di respet y poco responsabilidad cu Minister di Relacion di Reino Gerlien Croes a trata cu e topico importante aki pa Pueblo. E mandatario por lo menos 3 siman prome cu e reunion di Rijksministerraad ya mester a manda TUR informacion pa pone riba agenda, y tabata tin TUR chens pa informa Pueblo, pero e no a haci esaki. Ela prefera biaha rond haci “sightseeing” en bes di splica Pueblo cu elo bay entrega Aruba su autonomia pa un saco di placa.
No culpa MEP, Gerlien ta e entreguista
Pa remata awo e minister aki kier culpa MEP, pero Gerlien mester compronde cu ta su persona a haci cos tras lomba di Pueblo, y ta su persona ta bay pasa pa historia como entreguista di e autonomia cu tanto MEP a lucha pa logra y pa mantene na bienestar di Aruba.
