E decision reciente di Gobierno AVP FUTURO pa finalmente nombra un Minister Plenipotenciario (GevMin) na Hulanda, ta mustra cu e presion politico a funciona, pero tambe cu Minister di Relacion den Reino Gerlien Croes a gaña pueblo di Aruba.
Algun luna pasa, ainda Minister Gerlien Croes tabata defende e decision pa no nombra un GevMin na Hulans, cu e argumento cu e puesto ta costa pueblo demasiado placa. Sin embargo, despues di critica fuerte y presion den Parlamento, Gobierno AVP FUTURO a cambia rumbo y a decidi pa nombra un GevMin den persona di sra. Mildred Schwengle.
“Prome pueblo a wordo bisa cu no por nombra un GevMin pasobra ta caro. Cu pa spaar placa, Minister Gerlien Croes mes lo biaha cada luna bay Hulanda. Awo a resulta cu Aruba toch a nombra un GevMin. Esaki ta mustra cu pueblo a wordo gaña pa Gerlien cu e argumento di costo halto,” Parlamentario Maduro ta expresa.
Maduro a agrega cu representacion permanente na Hulanda no ta un luho, sino un obligacion di Aruba ancra den Statuut di Reino Hulandes. E situacion aki ta mustra cu e decision original di Gerlien Croes tabata mal pensa y cu ta danki na presion politico, Gobierno AVP FUTURO a corigi nan eror. Ta keda si e hecho lamentabel, cu Gerlien ta gaña pueblo!
