Nos a tuma nota di e mensahe di Minister di Enseñansa Gerlien Croes na e veld di enseñansa den cual e mandatario ta purba scapa cara door di tira culpa riba MEP. Segun Gerlien, e gobierno anterior a laga debe atras tur caminda y ta pesey e no por hisa e salario di maestronan. Aki nos ta bolbe gara Minister Gerlien Croes ta gaña e veld di enseñansa.
Gobierno di MEP a paga su debenan
E gobierno anterior di MEP a cumpli cu tur pago di su debenan, sea ta compania local of ta pago di debe internacional. Gobierno di MEP hasta a cuminsa paga companianan local den 60 dia enbes di e 90 di pago cu gobierno ta acorda. Tambe a laga un situacion di likidez atras den cual gobierno por paga su debe den 30 dia mes.
Placa di surplus por bay pa Enseñansa
E ta un lastima cu Gerlien a stop e trabounan cu a wordo haci pa un comision di ex Minister Endy Croes pa hisa salario di e maestronan. Tambe ta tristo mira Gerlien critica, chercha y nenga cu MEP a traha surplus, siendo cu ta di e placa ey ta paga e reparatietoeslag di 250 florin pa pensionado, cune Geoffrey ta gaba cu tin 70 miyon florin pa inversion den 2025, y cu e placa di e surplus por a subi salario den enseñansa.
Ta bolbe gara Gerlien ta gaña
Ta hopi lamentabel pa bolbe gara Minister Gerlien Croes di enseñansa ta gaña. Banda cu e ta duna un mal ehempel na comunidad y specialmente na nos hobennan, e ta dal e veld di enseñansa cu a sostene TUR TUR, un bofta den nan cara cu su gañamento.
