Parlamentario Xiomara Maduro durante e encuentro publico cu Sindicatonan na Parlamento, a expresa su gran preocupacion tocante e implicacionnan di e Rijkswet HOFA.
“E idea cu tin ‘placa barata’ ta un ilusion peligroso. No tin niun placa barato sin un prijs pa paga. Y e prijs aki, lamentablemente, ta nos dignidad como pueblo,” Maduro a expresa.
Segun e parlamentario, e condicionnan cu a wordo imponi den e Rijkswet HOFA ta bay mas aya di disciplina fiscal y ta toca e autonomia di Aruba como Pais dentro di Reino Hulandes. “Ora cu Hulanda ta obliga nos pa acepta condicionnan cu ta limita nos libertad di decision, nos ta wordo obliga pa bende nos mes dignidad contra nos mesun boluntad,” Maduro a bisa.
Maduro ta enfatisa cu bon maneho financiero ta importante, pero no por wordo logra a costo di soberania y respet propio di Aruba. “Nos mester busca solucionnan sostenibel cu ta respeta nos pueblo y nos derecho pa tuma decisionnan independiente.”
E parlamentario ta haci un yamada pa un debate habri y honesto den Parlamento y sociedad, pa asina evalua e consecuencianan real di e ley aki riba futuro di Aruba.
“Nos no por permiti cu presion externo ta determina nos rumbo sin considera e impacto profundo cu esaki por tin riba nos identidad y nos futuro como pais.”
