Prome Minister Mike Eman ta ausente den e discusion publico. Mientras Pueblo ta buscando splicacion, e ta pasa simannan na Hulanda cu un delegacion grandi promoviendo cu Aruba mester acepta HOFA, sin cu tin un dialogo honesto cu nos propio comunidad.
Minister di Finansa, Geoffrey Wever, ta reuni cu gremionan tras di porta cera y ta papia solamente riba e aspecto financiero. Pero HOFA no ta solamente placa, e tin un impacto constitucional serio cu ta afecta directamente e autonomia di Aruba y nos derecho di tuma decisionnan propio.
Minister di Relacion den Reino, Gerlien Croes, tampoco no a tene conferencia di prensa ni reunionnan publico pa informa Pueblo tocante e implicacionnan real di HOFA. E mandatario ta uza Facebook pa ataca oposicion y comparti informacion selectivo cu NO ta duna un bista completo di e situacion, y mayoria biaha ta informacionan eroneo.
Pueblo di Aruba no por wordo pidi pa acepta algo asina importante sin transparencia, sin participacion y sin informacion honesto. Nos dignidad, autonomia y destino no por wordo cambia pa promesanan financiero so.
Bon gobernacion ta cuminsa cu transparencia, respet pa Pueblo y dialogo habri, y TUR esaki ta locual precisamente falta awo.
