Despues di varios luna, finalmente Gobierno di AVP FUTURO a presenta e cambio na Ley di Landsverordening Instelling Ministeries (LIM). Segun Raad van Advies, e manera cu AVP FUTURO a structura e ministerionan carece di logica y ta representa un riesgo serio pa Aruba. Raad van Advies a rechasa e organisacion proponi pa Mike Eman y e resto di Ministernan di AVP FUTURO.
Ministerio di KOJIS ta e mas problematico
Raad van Advies a indica cu e combinacion di cartera cu tin menos coherencia ta e Ministerio di Relacion di Reino, Enseñansa, Hobennan, Innovacion y Deporte (KOJIS), bou di responsabilidad di minister Gerlien Croes.
Minister cu 5 ministerio ta receta pa fracaso
Segun Raad van Advies, duna cinco cartera diferente na un solo minister ta un experimento peligroso cu futuro di pueblo. E carteranan no tin relacion directo entre nan, y cada un riba su mes ta exigi hopi atencion y capacidad. Door di combina nan, e focus di gobernacion ta bay perdi y e trabou ta keda incompleto, cu resultado negativo pa comunidad.
Posicion di Aruba den Reino ta wordo debilita
Raad van Advies tambe ta adverti cu Relacion di Reino ta un cartera altamente sensitivo y strategico. Combina esaki cu Enseñansa, Hobennan, Innovacion y Deporte ta kita e atencion y diplomacia necesario pa defende interesnan di Aruba den Reino Hulandes. Tradicionalmente, Relacion di Reino ta wordo atendi pa Minister President, como cabes di e gabinete. Den e gobernacion di AVP FUTURO, sinembargo, e cartera aki a wordo combina pa conveniencia politico, algo cu por debilita Aruba su posicion den Reino Hulandes.
Concentracion di poder sin logica y cu riesgo pa Aruba
Parlamentario Xiomara Maduro ta expresa su preocupacion cu AVP FUTURO ta trata asunto serio como instrumento di wega politico. E organisacion di ministerionan mester wordo basa riba efectividad y interes di pueblo, no riba concentracion di poder. Segun Maduro, specialmente e structura di Ministerio di KOJIS ta crea un forti di poder politico cu no tin base logico y cu ta pone bienestar di Aruba na peligro. Ta lamentabel cu parlamentarionan di AVP FUTURO no ta worry cu e conseho di Raad van Advies y no ta realisa cu un concentracion di poder asina ta iresponsabel y ta perhudica e pueblo cu nan a huramente pa representa y defende.
