Parlamentario Xiomara Maduro ta expresa su preocupacion riba e forma cu Minister Gerlien Croes ta maneha e critica legitimo di comunidad tocante su biahe di trabou den avion priva, un asunto cu ya ta wordo conoci como e caso “Jetlien”. Segun Maduro, e punto central di e discusion ta simpel: transparencia y cumplimiento cu regla di integridad den gobernacion. “Den un estado di derecho, tur funcionario publico y specialmente un minister, tin e obligacion di duna claridad y presenta prueba ora cu tin duda riba uzo di recurso of conducta oficial,” Maduro ta expresa.
Contradiccionnan den Declaracion di Minister Croes
Parlamentario Maduro a enfatisa cu, na momento cu e minister a wordo cuestiona, enbes di presenta un recibo di pago cu ta comproba cu e mes a cubri su gastonan, e minister a opta pa duna splicacion cu cada bes a keda cambia. Entre otro, e minister a bisa cu ta e mes a paga e biahe fo’i su salario, despues ela declara cu e gasto a wordo comparti, y mas reciente e minister a trata di compara e biahe di trabou den avion priva cu un salida familiar na restaurant unda no ta normal pa duna cuenta ken a paga. Parlmentario Maduro ta califica e comparacion aki como uno “for di luga y un falta di seriedad pa e responsabilidad cu e funcion di Minister ta exigi.”
“Si e recibo di pago tabata presenta for di principio, tur e cuestionamento lo a caba mesora,” Maduro a indica. “Y si tabatin un eror di principiante, pueblo di Aruba ta lo suficientemente maduro pa comprende y pordona e eror. Pero loke nos ta mira awor ta un patronchi di Minister Gerlien Croes pa evita responsabilidad, cambia version y culpa oposicion.”
Cuestiona no ta Atake, sino un Deber Constitucional
Maduro ta enfatisa cu oposicion tin no solamente e derecho, pero tambe e deber di cuestiona y pidi claridad ora tin duda riba integridad gubernamental. “Esaki no ta un atake politico; esaki ta cumpli cu nos rol constitucional pa controla Gobierno y proteha interes di pueblo.” Ademas, e parlamentario ta preocupa pa mira cu e retorica di e minister te ainda ta haya apoyo ciego di parti di simpatisantenan, enbes di transparencia y rendicion di cuenta. “Democracia no ta basa riba fe ciego, pero riba hecho, prueba y responsabilidad.”
Finalmente, Maduro ta cuestiona dicon e propio simpatisantenan di e minister no ta exigi pa mira e prueba concreto? Transparencia no mester ta selectivo. Si e minister a paga su biahe, mustra e recibo. Asina simpel!
