Parlamentario Xiomara Maduro ta expresa su preocupacion serio riba e falta di interes y preparacion cerca algun parlamentarionan di coalicion AVP–FUTURO riba e Rijkswet HOFA.
“Ta preocupante cu hende cu tin responsabilidad di tuma decision importante pa nos pueblo, no ta plenamente informa riba e contenido di e ley y ni su posibel consecuencia pa Aruba. Decisionnan di e caliber aki, merece estudio, comprension y compromiso serio,” Parlamentario Maduro ta expresa.
Esaki a bira bisto durante e encuentro publico cu Sindicatonan, na unda Sindicatonan mes a sinti e necesidad di splica e Parlamentarionan di AVP FUTURO e contenido di e ley y su consecuencia pa Pueblo. “Parlamemto mester ta un espacio di conocemento, preparacion y debate responsabel, pesey locual a pasa awe den reunion, tabata un ‘dieptepunt’ pa Parlamento,” Maduro ta enfatisa.
Maduro ta haci un yamada na tur Parlamentario di AVP FUTURO pa tuma nan trabou y Aruba su futuro mas na serio: informa, prepara y actua semper den interes di pueblo. Pueblo di Aruba merece liderazgo responsabel y bon informa. Locual e Fraccion di AVP y FUTURO a presenta awe, a laga hopi di desea.
