Parlamentario Xiomara Maduro ta pidi gobierno AVP FUTURO pa duna claridad urgente riba e situacion di AWSS, cu ta un proyecto esencial pa salud publico y futuro di nos turismo.
AWSS a wordo lanta pa reemplasa RWZI, ya cu e planta di 40 aña bieuw por trata solamente 4 mil cubico di awa sushi pa dia, mientras cu e hotelnan y comercio na Noord ta genera mas cu 12 mil cubico pa dia. E planta nobo ta diseña pa e expertonan di e compania Hulandes Haskoning y por trata 16 mil cubico pa dia. Nan a calcula cu e inversion necesario pa un planta moderno y eficiente lo tin un costo di 250 miyon florin.
Awo caba turistanan via e EDcard ta pagando 20 dollar y esaki ta bay directo pa AWSS su financiamento. Ya caba hopi banco/lenders a mustra nan confiansa den e modelo financiero di AWSS y ta dispuesto pa financia e inversionnan necesario, pero lamentablemente e gobierno nobo di AVP FUTURO a cuminsa cu e wega politico di kita e miembronan di e hunta di supervision hunto cu e director y crea un situacion contra bon gobernacion den cual ta para e proyecto di AWSS sin ningun debido splicacion.
Segun Maduro, “AWSS ta basa riba reglanan di “good corporate governance code” cu e control door di e banconan/lenders cu tin di duna aprobacion na tur miembro di e directiva di AWSS. Si gobierno AVP FUTURO kier cambia algo, nan mester presenta un plan concreto, y no djies crea confusion y pone Aruba na riesgo ambiental innecesario.”
Si Gobierno no actua awor, Aruba por enfrenta un drama ambiental y daño na turismo. E pueblo merece transparencia, direccion y decision cla di Gabinete AVP FUTURO riba e situacion penoso cu ta reina na AWSS.
