Dia 21 di februari, rond mundo ta celebra Dia Internacional di Lenga Materno. Pa e ocasion special aki Parlamentario Xiomara Maduro tabata presente na un charla di sr. Mirto Laclé na Biblioteca Nacional titula: “Ban causa furor cu Dia Mundial di Lenga Materno.” Un bunita evento na unda nos lenga materno Papiamento a wordo celebra den canto, poesia, musica y literatura.
E publico grandi presente a wordo deleita pa cancionnan clasico presenta pa e artista Ronny Kock, Grupo Rondalla Universo y Academia Musical Harpa y Cuarta bou guia di e maestro Edgard Kelkboom. Esnan presente a keda conmovi pa e poemanan declama pa e poetanan Aurelia Croes y Marilis Becker, y tambe pa e bunita dedicatorio postumo na Frank Croes qepd, pa su aporte musical.
Durante e anochi, e autor Desiree Correa a presenta su buki titula “Toi, toi, toi” cu ta un compilacion di obra di teatro na Papiamento. Tambe notario Ralph Yarzagaay a splica un tiki mas di e buki “El Papiamento, la gramática más sencilla” skirbi pa dr. Rodolfo Lenz na aña 1926. cu ta e prome investigacion scientifico riba Papiamento. E buki aki, cu porcierto ta cumpli un centenario y ta wordo considera di gran balor, a wordo re-edita pa notario Ralph Yarzagaray na aña 2009, y ta contene un introduccion di drs. Mirto Laclé.
Parlamentario Xiomara Maduro ta gradici Mirto Laclé y señora pa un bunita evento na unda Papiamento a biba den mente y curason di tur presente. “Papiamento ta mi idioma y na unda e ta, mi tambe kier ta,” ta palabranan cu cual Parlamentario Xiomara Maduro kier extende un invitacion na Pueblo di Aruba pa aprecia, balora y papia nos lenga materno Papiamento.
