Diasabra mainta, durante un reunion di mediacion cu a tuma lugar na Bestuurskantoor, Marisol Lopez Tromp a wordo presenta copia di un carta, unda e dos parlamentarionan di POR, a firma un carta, unda nan ta kita nan sosten definitivamente na Minister Lopez Tromp. E reunion lo bay traha un relato di e situacion y pa asina presenta esaki na Gobierno.
Motibonan den e carta ta bisa:
1. Cu Minister Lopez Tromp ta keda desafia Fraccion di POR y liderasgo di e Partido publicamente,
2. Ta nenga di comunica cu miembronan di fraccion no obstante iniciativa di banda di fraccion.
3. Mal informa riba asunto di Parke Nacional Arikok ( Utv/Atv’s)
4. Cu Minister Lopez Tromp a ataca lider di Por, Sr. Andin Bikker publicamente riba asunto di spearfishing a base di mentira.
Segun Minister Lopez Tromp, e no ta reconoce cu e situacion di trabao a bira “onwerkbaar”, manera e carta cu el’a ricibi di Prome Minister ta sugeri.
E situacion aki ta reinando desde 5 di Juni 2020 unda POR a kita su sosten for di Lopez Tromp. Despues di esey a haci apelacion pa nan regla e asunto interno. A bini cu un comicion pa intermedia y un reunion entre Bikker cu Lopez Tromp a tuma lugar. A keda palabra cu lo tuma lugar un segundo reunion, cual mester a tuma lugar dia 24 di Juni 2020, riba e mes un dia cu a tuma lugar un inval den caso Flamingo, cual a haci cu e reunion e dia ey no a bay door y despues no a sigui ningun reunion mas.
Segun e acuerdo di gobernacion entre e tres partidonan, ora cu tin cualke impase o crisis, mester yama un comicion di mediacion. Esaki a tuma lugar diasabra mainta y awor e comicion lo mester traha un relato pa presente na Gobierno. Lo mas probabel ta cu e comicion lo conclui cu no tin solucion pa e situacion y e ora ta keda na Gobierno pa tuma e siguiente paso, pa presenta e caso aki na Parlamento.
