Recientemente Parlamento di Aruba a reuni cu Stichting Hunto pa asina haya un “update” riba e proyectonan mas recien. Un di e proyectonan cu nan e menciona, cu a zona hopi interesante, ta e proyecto di e unidad mobil. E proyecto aki ta proyecto cu Stichting Hunto kier bin cune pa asina bishita e adictonan ambulante den centro di ciudad na Oranjestad y San Nicolas pa asina duna nan ayudo no solamente den forma di cuminda, y laga nan laba nan pañanan, pero tambe pa duna nan guia y conseho pa bay den e caminda pa busca ayudo permanente y structural.
Parlamentario Evelyn Wever-Croes a indica cu pa e proyecto aki, Gabinete Wever-Croes durante su gobernacion, kier a aloca fondo den e presupuesto 2025. Lamentablemente Parlamento di e gobierno nobo, y e gobierno nobo di AVP -Futuro no a bay di acuerdo cu esaki.
Sinembargo, Parlamentario Wever-Croes a expresa di ta contento di tende cu parlamentarionan cu ta sostene coalicion a indica cu nan lo sostene e proyecto aki, creando un speransa cu pronto e proyecto aki por bira un realidad. Stichting Hunto ta kere den e proyecto aki y lo sigui busca otro fondo pa por realisa esaki. Pa por trece bida bek den caya, mester atende cu e tema di adictonan ambulante, y e unico manera ta pa bin cu e solucion cu Gabinete Wever-Croes hunto cu Stichting Hunto a laga atras, cu ta e unidad mobil.
